Nýtt lið og ný í­búð með litla bróður: „Var svo­lítið þröngt með mig á sófanum“

Á mánudaginn fyrir viku var greint frá því að Arnór hefði samið við Noregsmeistara Kolstad. Tveimur dögum seinna spilaði hann sinn fyrsta leik fyrir liðið, þegar það mætti Pick Szeged í Meistaradeild Evrópu. Arnór lék svo sinn fyrsta deildarleik fyrir Kolstad um helgina og skoraði þá fjögur mörk í sigri á Haslum, 34-42. Í fyrradag skoraði Arnór einnig fjögur mörk þegar Kolstad tapaði fyrir Kielce, 31-30, í Meistaradeildinni.

„Ég var búinn að vera að tala við umboðsmanninn um að reyna að komast frá Löwen til að geta fengið að spila einhvers staðar og fá meiri spiltíma. Þá var Kolstad búið að heyra í mér að ég gæti komið í janúar. En svo viku seinna hringir umboðsmaðurinn í mig og segir að þeir vilji fá mig sem fyrst. Maður hafði bara einn dag til að pakka og svo var bara flogið af stað og maður mættur. Ég samdi á sunnudag/mánudag, tók eina og hálfa æfingu og svo beint í leik,“ sagði Arnór í samtali við Vísi. Hann var þá í miðjum flutningum ásamt bróður sínum.

Arnór kveðst afar ánægður með niðurstöðuna, að vera kominn til Kolstad.

„Ég var fyrst og fremst að hugsa um að fá meiri spiltíma og komast eitthvað til að spila. Þegar þetta kom upp var það draumur. Að spila í norsku deildinni og fá Meistaradeildarleiki inn á milli er geggjað,“ sagði Arnór.

Hef greinilega ekkert verið inni í plönunum

Hann gekk í raðir Löwen frá Val fyrir síðasta tímabil. Arnór fékk lítið að spila þá og var lánaður til Gummersbach seinni hluta tímabilsins. Hann vonaðist til að spiltíminn myndi aukast á þessu tímabili en svo varð ekki og því ákvað Arnór að róa á önnur mið.

„Hann er auðvitað frábær sem er í stöðunni núna, Ivan Martinovic. Hann spilar frábærlega og ég var meira á miðjunni hjá Löwen á þessu tímabili. Ég hef greinilega ekkert verið inni í plönunum á þessu ári og var kannski of seinn í sumar að reyna að finna mér eitthvað sem mér leist vel á. Þá þurfti ég bara að taka slaginn og reyna að koma mér í janúar,“ sagði Arnór.

„Ég ætlaði alveg að gefa þessu tækifæri og reyna að vinna mig inn í liðið en þegar þeir voru komnir til baka eftir Ólympíuleikana og fyrir fyrsta leik og allt svoleiðis fjaraði þetta út. Þá reyndi ég að heyra í umboðsmanninum sem fyrst og koma þessu í gang.“

Eftir komu Arnórs eru fimm Íslendingar á mála hjá Kolstad. Auk Arnórs og Benedikts leika Sveinn Jóhannsson, Sigurjón Guðmundsson og Sigvaldi Guðjónsson með liðinu. Sá síðastnefndi er fyrirliði þess. Arnór kveðst ánægður með að vera kominn í sannkallað Íslendingalið og farinn að spila aftur með bróður sínum.

Sagði mér að stökkva á þetta

„Það hjálpaði alveg til að það eru margir Íslendingar hérna og sérstaklega Benni. Það hjálpaði mjög mikið til og hann talaði bara vel um félagið; að þetta væri spennandi og skemmtilegt og ég ætti að stökkva á þetta,“ sagði Arnór.

„Við spiluðum saman í gær og maður fékk svona endurlit hvað þetta var geggjað. Við erum enn með þessi tengsl og þau eru ekkert horfin.“

Hjá Kolstad deilir Arnór stöðu hægri skyttu með Magnusi Søndenå sem kom til liðsins frá erkifjendunum í Elverum fyrir tímabilið.

„Ég vonast til að við skiptum þessu jafnt á milli okkar. Hálfleik og hálfleik eða meira eða minna, eftir því hvor spilar betur,“ sagði Arnór.

Alvöru agi og mörg kerfi

Lið Kolstad er skipað mörgum norskum landsliðsmönnum, meðal annars stórstjörnunni Sander Sagosen, og þjálfarinn Christian Berge þjálfaði lengi landsliðið. Arnór segir að enginn afsláttur sé gefinn hjá Kolstad. Þar eigi hlutirnir að vera í lagi.

„Þeir eru með alvöru aga í þessu, mörg kerfi og vilja gera þetta upp á tíu; staðsetningar, hvernig við spilum kerfin og rosa nákvæmt en auðvitað máttu gera þitt. Þetta er skemmtilegt, margt nýtt sem maður þarf að læra en þessir menn þarna eru duglegir að hjálpa mér að koma mér inn í þetta. Þeir eru mjög skilningsríkir,“ sagði Arnór.

Eftir komuna til Þrándheims flutti hann inn til Benedikts. Íbúðin var hins vegar heldur lítil fyrir þá tvo og bræðurnir fundu sér því nýja og eru að koma sér fyrir í henni.

Erum að taka við Þrándheim

„Benni var bara í mjög góðri íbúð einn en þegar ég kom var þetta orðið svolítið þröngt, með töskurnar úti um allt og ég á sófanum. Við urðum eiginlega að flytja og vorum mjög heppnir að finna íbúð sem fyrst. Við erum bara hægt og rólega að færa okkur yfir í nýju íbúðina,“ sagði Arnór sem á von á því að samgangurinn við hina Íslendingana verði talsverður.

„Það er mjög fínt og ég held að það verði einhverjir hittingar með Íslendingunum. Við erum að taka yfir, Íslendingar í Þrándheimi,“ sagði Arnór léttur að lokum.