Yfir­gnæfandi líkur á ó­veðri á kjör­dag og lík­legt að vegir teppist

Landskjörstjórn hefur fundað reglulega með Veðurstofunni í vikunni vegna veðursins en verði óveður hafa þau heimild til að fresta kosningu á ákveðnum stöðum í allt að viku. Einar fór yfir veðrið á kjördag í Bítinu á Bylgjunni í morgun.

Einar byrjaði á því að vara við flughálku í morgun á Suðurlandi og víða annars staðar. Það eigi að hlýna í dag svo það ætti að lagast en svo í kjölfarið eigi að frysta aftur. Það komi í nótt kalt loft frá Grænlandi og í fyrramálið verði því kalt og fram á föstudag.

„En menn eru eðlilega að horfa á veðurspána fyrir kjördag og hún hefur verið pínulítið óljós fram undir þetta en er að skýrast,“ segir Einar.

Tveir massar sem takast á um yfirrráð

Hann segir að landið verði á milli tveggja loftmassa sem takist á um yfirráð. Það líti því út fyrir að stærstur hluti landsins verði í kalda loftinu í norðaustanátt og ekkert að veðrinu um suðvestan- og vestanvert landið. Þar verði norðaustanátt og úrkomulaust.

„En það er verið að spá skörpum skilum á milli Íslands og Færeyja og þau munu samkvæmt spánum liggja utan í Austurlandi,“ segir Einar og það verði líklega talsvert mikil úrkoma þar og að hún falli öll sem snjór.

„Það er verið að spá talsvert mikilli hríð á Austurlandi,“ segir hann og að það verði hríð á Norðurlandi og mögulega á norðanverðum Vestfjörðum. En ekki úrkoma eins og á Austurlandi.

Einar segir að í gær hafi hann verið með 60 prósent líkur á að þessi spá muni standast, hann hafi ekki náð að reikna það í morgun en geri ráð fyrir að líkurnar séu meiri í dag á því að þessi spá rætist.

Einar segir að sem dæmi sé gert ráð fyrir því að Fjarðarheiði falli 40 millimetrar af snjó á laugardag.

Einar segir að það muni byrja að snjóa um nóttina og haldi áfram allan daginn. Það skáni undir blálokin en það sé mjög líklegt að einhverjir vegir teppist, eins og Fjarðarheiði og Möðrudalsöræfi og mögulega Fagridalur.

Gæti náð að Hornafirði

Hann segir það ekki alveg liggja fyrir hversu langt þetta veður teygir sig en það gæti náð allt að Hornafirði. Hann segir augljóst að þessu muni fylgja einhver vandræði við kosningu og það sé kjörstjórnar að taka á því.

Vegagerðin verði væntanlega með meiri þjónustu en þegar það er orðið blindbylur þá sé erfitt að ryðja. Samgöngur gætu orðið erfiðar á fjallvegum en líka í byggð.

Einar segir veðrið ganga niður aðfaranótt sunnudags og því, ef verður þörf á, væri hægt að bjóða upp á kosningu á sunnudag á þessum stöðum þar sem veðrið verður slæmt.

Einar segir að þegar var kosið síðast til Alþingis á þessum tíma 1979 hafi strax verið ákveðið að hafa tvo kjördaga. Árið 2010 var kosið til stjórnlagaþings þann 27. nóvember en þá var kosning einn dag.

Viðtalið við Einar er hægt að hlusta á hér að ofan.