Bitist af mikilli hörku um at­kvæði í­búa í Ölfusi

Í dag hefur bréfi frá Þorsteini Víglundssyni, talsmaður Heidelbergs á Íslandi, verið dreift til íbúa Þorlákshafnar. Þar segir að undanfarin þrjú ári hafi fyrirtækið átt í góðu samstarfi við bæjaryfirvöld og íbúa í Þorlákshöfn vegna áhuga fyrirtækisins á að hefja atvinnustarfsemi í bænum, reisa þar nýja höfn og vinnslu sem henni tengist.

Þorsteinn segir áformin vera og hafi ávallt verið að reynast góður granni. Og hann lýsir yfir einlægum vilja til að renna styrkari stoðum undir þann öfluga og blómlega bæ sem Þorlákshöfn sé. Þeir bjóði fram fjölbreytt atvinnutækifæri og tekjuaukningu fyrir bæjarfélagið. Þorsteinn lofar 160 varanlegum störfum auk fjölda nýrra starfa á byggingartíma. Efnislega endurtekur Þorsteinn það sem hann hafði áður sagt í viðtali við Vísi:

Þorsteinn segir að allt þetta sé undir íbúum komið, í atkvæðagreiðslu og boðar að endingu til íbúafundar í Versölum, Ráðhúsi Ölfuss, á miðvikudag 27. nóvember klukkan átta.

Segjum nei við Heidelberg

Við allt annan tón kveður hins vegar í bæklingi sem einnig var dreift í hús í dag, undir yfirskriftinni: „Segjum nei við Heidelberg“.

Um er að ræða myndskreyttan bækling þar sem farið er yfir áhrifin sem mega heita neikvæð. Nefnt er að til standi að flytja heilt fjall – Litla-Sandfell – úr landi sem fela í sér óafturkræfar breytingar en sé mögulega bara fyrsta skrefið hjá Heidelberg. Nýjustu rannsóknir svari ekki spurningum sem First Water, fiskeldisfyrirtæki, hafi sett fram þegar það fyrirtæki kærði fyrirætlanir Heildelbergs. Það sé því kynnt á fölskum forsendum.

Einnig er þar komið inn á mikla þungaflutninga um Þrengslin sem fylgi malarflutningunum. Hundrað og tíu ferðir á degi hverjum og er vitnað til Skipulagsstofnunar sem bent hefur á að „ekki er unnt að hefja stórfellda efnisflutninga úr Litla-Sandfelli um núverandi veg til Þorlákshafnar.“

Í bæklingnum, sem er nafnlaus, er sagt að staðhæfingar Heidelberg Materials um há meðallaun séu villandi í besta falli. Stóraukin mengun fylgi starfseminni og því velt upp að fasteignaverð lækki? Þá er sagt að fyrirtækið sé, án þess að hafa haft nokkra starfsemi í Þorlákshöfn, sé að kaupa sér velvild íbúa með því að styrkja íþróttastarf í bænum, svo eitthvað sé nefnt.

Hvers vegna ekki að bíða niðurstöðu dómara?

Þá er spurt hverjir hagnist og þar er sjónum beint að Þorsteini sjálfum auk aðventista sem eigi Litla-Sandfell. Greint er frá því að Kirkja sjöunda dags aðventista hafi gert samning við Eden Mining, sem sé milliliður og hagnist í raun án þess að gera neitt nema vera milliliðir. Myndir birtar af Kristni Ólafssyni og Eiríki Ingvarssyni auk Gavins Anthony, sem nýverið lét af störfum sem formaður Aðventista á Íslandi.

Nefnt er að Kirkja aðventista eigi námurnar en hópur aðventista standi nú í málaferlum við trúfélagið fyrir að hafa „skrifað ólöglega undir samningnum sem verkefni Heidelbergs byggist á. Ef málið vinnst verður samningurinn dæmdur ólöglegur og engin verksmiðja reist. Hvers vegna er verið að kjósa um verksmiðjuna í stað þess að bíða eftir niðurstöðu dómsstóla?“ er þar spurt.

• Segjum_Nei_við_HeidelbergPDF4.8MB
  Sækja skjal