Her­mann fer inn í hlýjuna: „Eitt af draumastörfunum sem þú færð“

Her­mann lét af störfum sem þjálfari karla­liðs ÍBV eftir nýaf­staðið tíma­bil þar sem að hann stýrði liðinu upp í efstu deild. Eyjamaðurinn var reiðu­búinn í að bíða þolin­móður eftir næsta starfi en var þó ekki lengi at­vinnu­laus því nú er hann orðinn þjálfari HK. Hann sér mögu­leika hjá liðinu sem féll ný­lega úr Bestu deildinni en Ómar Ingi Guðmundsson sagði upp störfum sem þjálfari HK eftir tímabilið.

„Stuttu eftir að Ómar lætur af störfum fæ ég sím­tal varðandi það hvort ég hefði áhuga á starfinu og væri til í að koma í við­tal,“ segir Her­mann varðandi að­dragandann að nýja starfinu. „Ég slæ til. Fer í viðtalið og er svo kallaður inn í annað við­tal nokkrum dögum síðar. Eftir það er svo sagt við mig að þeir myndu vera í sam­bandi við mig. Sem og þeir gerðu. Það var gengið til samninga og málið klárað núna síðastliðinn laugar­dag.“

„Ég var alveg til­búinn í að vera þolin­móður. Maður veit hvernig þessi bransi er. Það er ekkert gengið að því að hoppa strax í næsta starf. Ég var því alveg búinn undir það að það þyrfti ekkert að detta eitt­hvað strax inn. Þarna er rosa­lega flottur klúbbur á ferð, til­tölu­lega ungt félag og gaman að taka þátt í svona upp­byggingu og veg­ferð. Klúbburinn hefur alla burði til þess að taka fram­förum og þakið er ansi hátt þarna. Þetta er eigin­lega eitt af þeim draumastörfum sem þú færð. Að geta tekið þátt í upp­byggingu og fram­förum.“

Spennandi og skemmtilegt vinnu umhverfi

Her­mann skrifar undir þriggja ára samning í Kópa­voginum og veg­ferðin hefst í hinni feikna sterku Lengju­deild á næsta ári. Deild sem Her­mann vann með ÍBV í ár. Stefnan er sett á að gera HK að stabílu efstu deildar félagi.

„Það er langtíma­mark­mið. Það er klárt. Raun­hæft mark­mið. Óstöðug­leikinn er til staðar þegar að þú ert með marga unga leik­menn. HK hefur verið að gefa mörgum ungum leik­mönnum tækifæri og byggja þá upp fyrir framtíðina. Starfið sem að Ómar og fólkið í kringum hann hefur verið að skila af sér er frábært. Þeir eru að skila af sér flottu búi og margir leik­menn komnir með reynslu og smá smjörþef af leikjum í efstu deild og meistara­flokki. Það er gríðar­lega mikilvægt og ég held að allir í fót­boltanum hér á Ís­landi beri virðingu fyrir því.“

„Það geta ekki allir verið að keppa á toppnum en stefnan er fyrst og fremst að byggja upp betri og fleiri leik­menn. Geta tekið þátt í því sem að þau félög sem eru með flesta iðk­endur eru að gera. Selja fleiri leik­menn er­lendis. Að fleiri geti tekið næstu skref. Það er heildar­mark­miðið. Það er frábært fólk hjá HK og allir hungraðir í að gera þetta eins vel og hægt er. Þetta er gríðar­lega spennandi og skemmti­legt vinnu um­hverfi.“

Lykilmenn fara

Margir leik­menn HK eru að renna út á samningi og þeirra á meðal er fyrir­liðinn Leifur Andri Leifsson. Her­mann býst við því að ein­hverjir lykil­leik­menn hverfi á braut en fyllt verði í þau skörð.

„Það eiga sér alltaf stað ein­hverjar hreyfingar þegar að lið fellur. Ein­hverjir leik­menn sem vilja vera áfram í efstu deild. Það er öruggt að ein­hverjir leik­menn munu fara. Hvað Leif varðar þá er hann goðsögn í HK, auðvitað viljum við halda honum en þetta er í hans höndum.“ 

„Ég vissi það að hann væri að skoða sín mál. Yngri kjarninn verður áfram hjá okkur en klárt að ein­hverjir lykil­menn fara. Það verður fyllt í þau skörð sem þarf að fylla í. Svo fá fleiri ungir strákar stórt tækifæri. Það eru tækifæri fólgin í því að fara niður. Þú getur leyft fleirum að fá sénsinn. Það er alveg öruggt.“

Stefnan sett beint upp

Verk­efnið í Lengju­deildinni á næsta tíma­bili er ærið og fékk Her­mann að kynnast því með liði ÍBV á nýaf­stöðnu tíma­bili hversu erfið deildin er en aðeins efsta liðið fer beint upp í Bestu deildina á meðan að liðið í öðru til fimmta sæti berjast um hitt lausa sætið sín á milli í um­spili.

„Þetta var skemmti­leg deild í sumar og fyrir­komu­lagið vel heppnað. Þetta var lifandi alveg fram í síðustu um­ferð varðandi það hvaða lið færu í um­spilið og hverjir færu beint upp. Allir að vinna alla og tína stig hvort af öðru. Það eru mörg sterk lið í þessari deild. Flest lið gera til­kall í að fara upp. Við vitum að það er ekkert gefið í þessu. Það mun gilda á næsta tíma­bili. Þetta verður skemmti­legt og krefjandi verk­efni fyrir okkur, að koma okkur aftur upp.“

Og er það ekki stefnan að fara strax aftur upp í Bestu deildina?

„Að sjálfsögðu. Stefnum beint að því að vinna deildina og koma okkur beint upp.“

Fer inn í hlýjuna

Eyjamaðurinn Her­mann hefur þá ímynd út á við að vera harður í horn að taka, hörku­töl og baráttujaxl sem virðist þrífast best í ekta ís­lenskum aðstæðum. Eins og frægt er orðið spilar HK sína heima­leiki inni í Kórnum sem fer mis­vel í aðila utan félagsins. Er það ekki dálítil and­staða við ímynd Her­manns að færa sig inn í hlýja loftið í Kórnum?

„Jú,“ segir Hermann og hlær. „En aðstaðan er frábær. Nýtt gervi­gras og maður getur treyst á sömu aðstæður. Það er nú svolítið nýtt. Að þurfa ekki að taka til­lit til veðursins fimm sinnum á dag. En vissu­lega æfum við úti líka. Þetta eru því ekki stórar breytingar. Það er höll í Vest­manna­eyjum líka þótt hún sé bara hálf, en aðal breytingin er sú að við vitum að hverju við göngum á heima­velli á leik­degi. Það er mjög jákvætt að geta staðið við eitt plan.“