Fram­lenging Körfuboltakvölds: Njarð­vík getur orðið Ís­lands­meistari eins og Valur

Njarðvík hefur unnið fjóra af fyrstu fimm leikjum og lagði nú nýlegast Íslandsmeistara Vals á heimavelli mjög örugglega. 

Getur Njarðvík orðið Íslandsmeistari? 

Lærisveinar Rúnars Inga, geta þeir orðið Íslandsmeistarar?, spurði Stefán Árni.

„Ekki með þennan hóp, ef þeir fá einn leikmann í viðbót, já þá er alveg hægt að tala um það,“ svaraði Helgi Már.

Hvernig leikmann viltu fá inn?

„Bara einhvern einn skrokk í viðbót, góðan varnarmann og gæi sem getur refsað fyrir utan þegar hinir eru búnir að soga í sig varnarmennina. Þarf ekki að vera einhver snillingur, bara sómasamlegur leikmaður,“ lauk Helgi máli sínu.

Já, hvort sem nýr leikmaður komi inn eða ekki

Þá færðist sama spurning til Pavels sem brosti snöggt og vildi gefa góða fyrirsögn með svari sínu.

„Ég segi já. Ég sagði áðan þegar við vorum að tala um leikinn að Njarðvík liti út eins og Valur núna, og Valsmenn eru Íslandsmeistarar er það ekki? Það þarf mjög margt að ganga upp en ég get alveg séð leið, hvort sem það komi nýr leikmaður eða ekki, að verða… Valur!“

Stefán tók undir og útskýrði fyrir Helga að bransinn snerist um að selja áður en hann færði sig yfir í spurninga sem hann spann á staðnum.

Innslagið úr Körfuboltakvöldi Stöðvar 2 Sports má sjá í spilaranum hér fyrir ofan.