Stór­sigur beggja innan skekkju­marka

Trúverðugari kannanir benda til jafnar baráttu og að fjölmargar sviðsmyndir séu í kortunum.

Í aðdraganda forsetakosninganna í Bandaríkjunum hafa þó nokkrar kannanir litið dagsins ljós sem gefa til kynna að Trump eigi greiða leið að sigri næsta þriðjudag. Það er þrátt fyrir að lang flestar kannanir sem framkvæmdar eru vestanhafs sýna kosningabaráttuna hnífjafna.

Í greiningu New York Times segir að þessar kannanir eigi það allar sameiginlegt að hafa verið framkvæmdar af íhaldssömum aðilum. Þó þær hafi lítil áhrif haft á spálíkön sérfræðinga eru ýmsir sem telja þessar kannanir, og annarskonar væringar á veðmálamörkuðum í Bandaríkjunum, þjóna öðrum tilgangi.

Sá tilgangur gæti verið að veita Trump sjálfum skotfæri til að grafa undan trúverðugleika niðurstaðna kosninganna og halda því fram, aftur, að kosningasvindl hafi kostað hann sigur.

Trump er þegar byrjaður að halda því fram að verið sé að svindla gegn honum í kosningunum. Það gerði hann einnig bæði fyrir kosningarnar 2016, sem hann vann, og fyrir og eftir kosningarnar 2020, sem hann tapaði.

Úr fimmtán í 37

Í greiningu NYT segir að undir lok kosningabaráttunnar 2020 hafi aðilar tengdir Repúblikanaflokknum birt fimmtán kannanir í svokölluðum sveifluríkjum. Á sama tímabili þessarar baráttu eru kannanirnar 37. Trump leiddi baráttuna í þrjátíu þeirra.

Á sama tíma hefur dregið töluvert úr fjölda hlutlausra kannana, eins og þeirra sem framkvæmdar eru af stórum fjölmiðlum. Af sem hafa verið birtar hefur um helmingur þeirra gefið til kynna að Trump eigi von á sigri.

Svipaða sögu er að segja af veðmálamörkuðum eins og Polymarket og Kalshi þar sem líkur Trumps á sigri hafa hækkað verulega umfram kannanir. Útlit er fyrir að þessar hækkanir megi rekja til tiltölulega fárra en hárra veðmála á sigur Trumps.

Verður sífellt jafnara

Samkvæmt spálíkani New York Times, sem byggir á meðaltali fjölmargra kannana, er fylgi Harris á landsvísu 49 prósent og fylgi Trumps 48 prósent. Vegna kjörmannakerfis Bandaríkjanna eru að þessu sinni sjö ríki sem skipta mestu máli.

Sjá einnig: Enn allt í járnum skömmu fyrir kjör­dag

Það eru Arizona, Georgía, Michigan, Nevada, Norður-Karólína, Pennsylvanía og Wisconsin.

Þau Harris og Trump mælast jöfn í Nevada og Wisconsin. Harris er minna en einu prósentustigi yfir Trump í Michigan og mælist Trump með forskot í hinum fjórum ríkjunum. Þriggja prósentustiga forskot í Arizona, tveggja prósentustiga forskot í Georgíu og um eins prósentustiga forskot í Norður-Karólínu og í Pennsylvaníu.

Allt er þetta innan skekkjumarka.

Bæði gætu unnið stórsigur

Í grein sem birt var á vef tölfræðimiðilsins FiveThirtyEight í gær segir að þó kannanir sýni að mestu að lítill munur sé á fylgi Harris og Trumps, sé ljóst að úrslitin geti orðið margskonar. Fjölmargar sviðsmyndir séu innan skekkjumarka kannana.

Þar kemur fram að í kosningunum 2020 hafi fylgi Joes Biden ofmetið í könnunum og árið 2016 hafi fylgi Trumps verið vanmetið. (Fyrst stóð ofmetið hér. Það var rangt.)

Munurinn á fylgi þeirra Harris og Trumps var í gær, samkvæmt líkani FiveThirtyEight, innan fjögurra prósentustiga í sjö ríkjum. Það feli til dæmis í sér að hafi fylgi Harris verið ofmetið eins og fylgi Bidens var ofmetið 2020, muni Trump sigra öll þau ríki og þannig tryggja sér 312 kjörmenn.

Fylgi Repúblikana hefur einnig verið ofmetið í aðdraganda forsetakosninga í Bandaríkjunum. Hafi fylgi Trumps verið ofmetið að þessu sinni, er útlit fyrir að Harris myndir vinna öll þessi sjö ríki og tryggja sér 319 kjörmenn.

270 kjörmenn þarf til að tryggja sér sigur.