Á­stæðan fyrir því að Ís­lendingar eru á móti Gumma Tóta

Hvert stig sem íslensk lið safna í Evrópukeppnum hefur áhrif á stöðu Bestu deildarinnar á styrkleikalista UEFA. Eftir sigurinn í gær er Ísland núna í harðri baráttu um að færast upp um flokk á listanum. Það myndi færa bikarmeisturum næsta árs á Íslandi sæti í undankeppni Evrópudeildarinnar 2026 og tryggja enn hærra verðlaunafé inn í íslenska knattspyrnu.

Víkingar geta með einu jafntefli eða sigri, í að lágmarki fjórum leikjum sem þeir eiga eftir í Sambandsdeildinni í vetur, komist upp fyrir Kósovó sem er í 33. sæti styrkleikalistans, en það er neðsta sætið sem gefur þátttökurétt í undankeppni Evrópudeildarinnar. Kósovó á ekki lengur lið í neinni keppni og getur því ekki safnað fleiri stigum í vetur.

Hins vegar er Armenía einnig fyrir ofan Ísland, í 34. sæti, og enn með lið í Sambandsdeildinni. Það er liðið FC Noah, sem landsliðsmaðurinn Guðmundur Þórarinsson (eða Gummi Tóta) leikur með. Þó að Íslendingar ættu alla jafna að vera þakklátir fyrir vinstri fót og söngrödd Guðmundar þá hafa þeir ærna ástæðu til að vonast eftir töpum hjá honum í Sambandsdeildinni í ár.

Það má nefnilega segja að Noah og Víkingur séu í sérstakri stigasöfnunarkeppni, fyrir sínar landsdeildir, og liðin mætast einmitt í Armeníu 28. nóvember í leik sem gæti þar með reynst afskaplega mikilvægur.

Beytir ekki baráttunni um helgina

Ísland er í dag með fjögur Evrópusæti; eitt sæti í undankeppni Meistaradeildar Evrópu og þrjú sæti í undankeppni Sambandsdeildar Evrópu. Íslandsmeistararnir fá sætið í undankeppni Meistaradeildar (og geta svo færst í undankeppni Sambandsdeildar eða Evrópudeildar ef þeir falla þar úr leik), og bikarmeistarar og liðin í 2.-3. sæti Bestu deildar fá svo sæti í undankeppni Sambandsdeildarinnar.

Um þessi sæti er einmitt hörð barátta um helgina og það eina sem er ljóst er að KA fær sæti í undankeppni Sambandsdeildar, sem bikarmeistari. Víkingur og Breiðablik berjast um sæti í undankeppni Meistaradeildar, og Valur og Stjarnan um síðasta sætið í undankeppni Sambandsdeildar.

Skammt síðan Ísland var í ruslflokki

Ef að Víkingar næðu að koma Íslandi upp í 33. sæti styrkleikalista UEFA myndi það hafa áhrif á næsta keppnistímabil. Það er að segja, bikarmeistarar næsta árs (eða liðið í 2. sæti Bestu deildar ef eitthvað lið verður bæði Íslands- og bikarmeistari) myndu fá sæti í undankeppni Evrópudeildarinnar sumarið 2026.

Bikarmeistararnir væru þar með öruggir um að spila að minnsta kosti tvö Evrópueinvígi, með tilheyrandi verðlaunafé, því lið sem falla út í undankeppni Evrópudeildar færast í undankeppni Sambandsdeildarinnar.

Vert er að hafa í huga að skammt er síðan að Ísland átti aðeins þrjú Evrópusæti. Þrjú íslensk lið fóru í undankeppnirnar 2022 og 2023, eftir að Ísland var komið niður í hóp fimm lægst skrifuðu þjóða Evrópu vegna slakra úrslita í Evrópukeppnum árin á undan. Við röðun á styrkleikalista er horft til úrslita síðustu fimm ára fram að árinu fyrir nýtt keppnistímabil.