Vildi vernda De Ligt með því að taka hann af velli

Leikurinn fór fram á gamla heimavelli De Ligt í Amsterdam en hann lék á sínum tíma með Ajax þar á bæ. Staðan í hálfleik var 2-1 gestunum í vil og var hægt að benda á De Ligt sem sökudólg í báðum þeirra. Holland skoraði snemma í síðari hálfleik og lauk leiknum með 2-2 jafntefli.

Í fyrra marki Þýskalands átti hinn 25 ára gamli De Ligt slæma sendingu út úr vörninni og í því síðara þá náði hann ekki að hreinsa almennilega frá marki. Það var ekki við hann einan að sakast þar en eftir að hafa verið heldur kærulaus gegn Bosníu og Hersegóvínu í leiknum á undan ákvað Koeman að taka miðvörðinn af velli.

„Auðvitað hefði ég viljað halda honum inn á vellinum en það virðist sem svo að hann sé að fara í gegnum tímabil þar sem honum er refsað fyrir hver einustu mistök sem hann gerir,“ sagði Koeman eftir leik.

„Ég gaf honum annað tækifæri í leiknum gegn Þýskalandi en ákvað á endanum að vernda hann með því að taka hann af velli,“ bætti Koeman við.

De Ligt gekk í raðir Man United í síðasta mánuði en hann hefur einnig spilað fyrir Bayern München, Juventus og uppeldisfélagið Ajax. Hann hefur ekki byrjað tímabilið frábærlega á Englandi en Man United steinlá fyrir erkifjendum sínum í Liverpool fyrir landsleikjahléið.

Nú er að bíða og sjá hvort þessar slæmu frammistöður muni elta De Ligt til Englands eða hvort hann geti skilið þær eftir og minnt fólk á af hverju hann var talinn einn efnilegasti miðvörður heims á sínum tíma.