Fé­lagar Elíasar með þrjú stangarskot en jöfnuðu undir lokin

Elías Rafn Ólafsson stóð á milli stanganna hjá Midtjylland. Hann hélt marki sínu hreinu í fyrri hálfleik en á 59. mínútu kom Cesar Blackman Slovan Bratislava yfir.

Dönsku meistararnir gáfust ekki upp og á 79. mínútu jafnaði Edward Chilufya, fjórum mínútum eftir að hann kom inn á sem varamaður.

Þar við sat en mark Chilufyas gerir stöðu Midtjylland fyrir seinni leikinn í Slóvakíu eftir viku viðráðanlegri.

Leikmenn Midtjylland voru mun hættulegri aðilinn í leiknum í kvöld og áttu meðal annars þrjú stangarskot áður en Chilufya jafnaði.

Elías lék sem lánsmaður með Mafra í Portúgal á síðasta tímabili en hefur verið aðalmarkvörður Midtjylland það sem af er þessa tímabils.