Svefninn skiptir máli!

Slík umræða á það þó til að fara út í alhæfingar og boð og bönn, sem gera það jafnvel að verkum að manni fallast hendur. Hvað er „rétt“ og hollast? Hvað ef ég get alls ekki sofnað og vaknað alltaf á sama tíma sólarhrings eða á börn sem vakna á næturnar? Er þá allt ónýtt og ég þarf að sætta mig við að fara í gegnum daginn aðeins úrillari og verr undir hann búin en aðrir sem eru með allt sitt á hreinu?

„Nei, alls ekki,“ segir Svanborg Kjartansdóttir, vörustjóri hjá IKEA. „Við höfum tekið þann pól í hæðina að minna fólk á að góður svefn sé á allra færi og þurfi þar að auki alls ekki að vera dýr. Við viljum gera svefn að einhverju sem þú hlakkar til; gera þetta skemmtilegt og beita við það heilbrigðri skynsemi.“

Litið sé til sex atriða sem myndi grunninn að gæðasvefni; þæginda, birtu, hitastigs, hljóðs, loftgæða og snyrtilegs umhverfis. Margt hafi áhrif á svefninn en það sé tiltölulega einfalt að hafa þessi atriði í lagi.

Aukin lífsgæði

„Í grunninn auðveldar góður svefn okkur að leggja af mörkum því hann hefur áhrif á hamingju, heilsu, gerir okkur afkastameiri og almennt virkari. Hann bætir samskipti fólks, styrkir sambönd af öllu tagi og hjálpar okkur að ná markmiðum. Þegar öllu er svo á botninn hvolft lifum við lengur og aukum lífsgæðin verulega ef við sofum vel,“ segir Svanborg. Þess vegna sé mikilvægara að koma sér upp rólegri svefnaðstöðu og finna leiðir til að ná að kúpla sig út, frekar en að nálgast svefninn eins og keppni.

Gefum líkamanum réttu skilaboðin

„Þar koma þessi grunnatriði sem ég nefndi inn sem einfaldur leiðarvísir,“ heldur Svanborg áfram. „Þægindin eru mikilvægust. Þægileg dýna, koddi sem hentar svefnstellingunni og rétta sængin eru þar lykilatriði.“

Þá sé það birtan; miklu muni um myrkvunargardínur sem dekki bæði náttúrulega birtu og skin borgarljósanna. Ef þörf krefji megi jafnvel hafa augngrímu við höndina. Litur lýsingarinnar skipti líka máli og hlý birta sé besti kosturinn fyrir háttinn. Ljósapera með stillanlegu litarhitastigi geti því verið góð fjárfesting. „Við þetta má bæta að skjánotkun fyrir svefninn er ekki góð hugmynd, eins og við vitum líklega öll núna, því skjáirnir gefa frá sér bláa birtu sem blekkir líkamann til að halda að nú sé tími til að vakna og gera það erfiðara að festa svefn.“

Snýst allt um kyrrð og ró

Hitastig í svefnherbergi ætti að vera í kaldara lagi, eða 13 til 20°C að sögn Svanborgar. „Við erum misheitfeng og það má stilla sig af með réttu dýnunni og misþykkum sængum. Hljóðið er næsta atriði sem við hugum að. Í fullkomnum heimi ætti svefnherbergið að vera rólegt athvarf þar sem ekkert truflar. Það er þó áskorun fyrir flesta. Mýkt í húsgögnum og öðrum húsbúnaði, eins og gardínum og mottum, dempa hljóð og færa herberginu ró.“

Svanborg segir loftgæði einnig leika stórt hlutverk í svefngæðunum. Víða í heiminum séu loftgæði afar slök, en það geti líka átt við hérlendis. „Það þarf að lofta út og svo geta viftur og lofthreinsitæki gert gæfumuninn.“

Síðast en ekki síst skipti það miklu máli að hafa svefnrýmið snyrtilegt og laust við alla óreiðu. Einfaldleiki í vali á húsbúnaði auk lausna sem haldi óreiðunni í skefjum auki líkurnar á værum svefni.

Svefninn á sviðið

Með þessi atriði og góðu ráð í huga geta líklega flestir búið sér stað þar sem hægt er að sofa vært og safna orku fyrir næsta dag. „Næstu mánuði ætlum við að leggja áherslu á að gefa gestum í versluninni, á IKEA.is og í IKEA appinu, innblástur til að bæta svefninn og lífið um leið,“ segir Svanborg að lokum.