For­ysta til fram­tíðar

Nú á vordögum hefur Þjóðkirkja Íslands það vandasama verkefni fyrir höndum að velja nýjan leiðtoga til að leiða starf kirkjunnar. Þetta tímabil er gróskutími hvar kirkjunnar fólk staldrar við til að ræða hvar við stöndum og hvert við viljum stefna sem opið og umfaðmandi samfélag kirkjunnar. Áskoranir þjóðkirkjunnar eru margar en sóknarfærin fleiri og mikilvægt að sem flest komi að umræðunni um mikilvægt starf boðandi og þjónandi kirkju.

Það er þakkarefni hve mörg hafa á undanförnum mánuðum gefið kost á sér í þetta mikilvæga verkefni. Og nú er svo komið að sóknarnefndafólk, kjörmenn, djáknar og prestar geta valið milli tveggja öflugra og reynslumikilla leiðtoga, en seinni umferð biskupskosninga hefst á morgun 2. maí á heimasíðu þjóðkirkjunnar.

Það er reynsla okkar sem þekkjum og höfum starfað með sr. Guðrúnu Karls Helgudóttur á vettvangi kirkjunnar að hún er traustsins verð. Guðrún er afar reynslumikil sóknarprestur og guðfræðingur, sem leitt hefur blómlegt starf fjölmennasta safnaðar landsins um margra ára skeið, komið að kennslu í guðfræðideild Háskóla Íslands og sömuleiðis sinnt mikilvægum trúnaðarstörfum á vettvangi kirkjunnar. Hún er öflug talskona kirkjunnar á opinberum vettvangi og hefur jafnframt því haft sig mjög í frammi í áhuga sínum og umhyggju fyrir réttindum jaðarhópa samfélagsins.

Hennar styrkleikar sem leiðtoga felast þó ekki síður í færni hennar til að virkja nærumhverfi sitt til góðra verka, efla þjónustu kirkjunnar í takt við þarfir sóknarbarna og styrkja böndin milli samfélags og þjóðkirkju.

Og það er vegna þessara kosta hennar og fjölmargra annarra sem leiðtogi, prestur og manneskja sem við kjósum sr. Guðrúnu Karls Helgudóttur sem biskup Íslands.

Við hvetjum alla sem kosningarétt hafa til að nýta atkvæðisrétt sitt á næstu dögum en kosningu lýkur á heimasíðu kirkjunnar á hádegi 7. maí.

Aðalsteinn Þorvaldsson, prestur í Akureyrar- og Laugalandsprestakalli

Aldís Rut Gísladóttir, prestur í Hafnarfjarðarprestakalli

Ása Laufey Sæmundsdóttur, prestur innflytjenda

Dagur Fannar Magnússon, héraðsprestur í Suðurprófastsdæmi

Daníel Ágúst Gautason, prestur í Fossvogsprestakalli

Edda Hlíf Hlífarsdóttir, prestur í Húnavatnsprestakalli

Erla Björk Jónsdóttir, sóknarprestur í Dalvíkurprestakalli

Eva Valdimarsdóttir, prestur í Fossvogsprestakalli

Eydís Ösp Eyþórsdóttir, djákni í Glerárprestakalli

Heiðrún Helga Bjarnadóttir Back, sóknarprestur í Borgarprestakalli

Helga Bragadóttir, prestur í Glerárprestakalli

Hildur Björk Hörpudóttir, sóknarprestur í Reykholtsprestakalli

Hólmfríður Ólafsdóttir, djákni í Fossvogsprestakalli

Jóhanna Gísladóttir, prestur í Akureyrar- og Laugalandsprestakalli

María Rut Baldursdóttir, prestur í Grafarholtsprestakalli

Oddur Bjarni Þorkelsson, prestur í Dalvíkurprestakalli

Sindri Geir Óskarsson, sóknarprestur í Glerárprestakalli

Stefanía G. Steinsdóttir, sóknarprestur í Ólafsfjarðarprestakalli

Toshiki Toma, prestur innflytjenda

Vigfús Bjarni Albertsson, prestur og forstöðumaður hjá Sálgæslu- og fjölskylduþjónustu kirkjunnar

Þóra Björg Sigurðardóttir, prestur í Garða- og Saurbæjarprestakalli

Þuríður Björg Wiium Árnadóttir, sóknarprestur Hofsprestakalls