Féllu á lyfja­prófi skömmu áður en þau unnu til verð­launa á Ólympíu­leikunum

New York Times greindi fyrst frá málinu í samvinnu við þýska fjölmiðilinn ARD. Öll greindust þau jákvæð fyrir hjartalyfinu trimetazidine (TMZ) í æfingabúðum fyrir leikana. Efnið eykur blóðflæði og hjálpar við að minnka sveiflur í blóðþrýstingi. Það hefur verið á bannlista síðan árið 2014. 

Lyfjaeftirlitsstofnun landsins (Chinada) úrskurðaði að efnið hafi smitast til sundfólksins, það hafi ekki vitandi eða viljandi innbyrt efnið og því var þeim ekki refsað.

Alþjóðalyfjaeftirlitsstofnunin (World Anti-Doping Agency, WADA), staðfesti við BBC að stofnunin hafi verið meðvituð um ákvörðun kínverska lyfjaeftirlitsins í júní 2021, mánuði áður en leikarnir hófust.

WADA sagðist hafa rannsakað málið vandlega og ráðfært sig við utanaðkomandi aðila. Að endingu var niðurstaðan sú að WADA gat ekki afsannað kenningu Chinada um óviljandi smit og engin leið var að sanna að sundfólkið hafi viljandi innbyrt efnið.

Alþjóðasundsambandið World Aquatics (þá þekkt sem FINA), var einnig gert meðvitað um málið í júní 2021. Sambandið sagðist fullvisst um að rannsókn málsins hafi farið fram með viðunandi hætti og véfengdi ekki niðurstöðu þess.

Rökstuðningur Kínverja byggði á því að ekki nema snefilsmagn hafi fundist í sundfólkinu, prófin voru tekin daglega yfir nokkra daga og einstaklingar skiptu milli þess að greinast jákvæð/neikvæð. Því væri ekki hægt að álykta misnotkun eða greinanlegan ábata af notkun lyfjanna. 

TMZ lyfjamál á undanförnum árum

Lyfið TMZ er náskylt hjartalyfinu Meldonium, sem rússneskir keppendur misnotuðu á Vetrarólympíuleikunum í Pyeongchang árið 2018. Sama lyf og felldi tenniskonuna Mariu Sharapova. 

TMZ fannst í blóði hinnar 17 ára gömlu Kamila Valieva. Valieva er rússneskur listskautari. 

Valieva bar fyrir sig svipaða vörn og kínverska sundliðið um óviljandi innbyrslu með smiti. Valieva hélt því fram að hún hefði óvart innbyrt hjartalyfið þegar hún borðaði jarðarberjaeftirrétt sem var undirbúinn á sama skurðarbretti og afi hennar notaði til að mylja töflurnar. Einnig hefði hún notað sama glas og afinn notaði til að leysa upp pillurnar.

Hún var bæði Evrópu- og Ólympíumeistari í greininni en féll á lyfjaprófi þann 25. desember 2021 og var í janúar á þessu ári dæmd í fjögurra ára keppnisbann.

Kínverski sundkappinn og Ólympíumeistarinn Sun Yang tók út þriggja mánaða keppnisbann árið 2014 eftir að TMZ fannst á lyfjaprófi hans. Hann tekur nú út fjögurra ára og þriggja mánaða bann, stytt eftir upphaflega átta ára dóm, eftir að hafa fallið á lyfjaprófi í annað sinn árið 2021.