Spáð miklu hvass­viðri og appel­sínu­gul við­vörun fyrir vestan

Versta veðrið verður á Vestfjörðum þar sem appelsínugul viðvörun er í gildi til miðnættis. Búast má við skafrenningi og takmörkuðu skyggni og eru truflanir á samgöngum líklegar, lokanir á vegum og tafir á flugi. Fólki er bent á að sýna varkárni og fylgjast vel með spám.

Gular viðvaranir eru sömuleiðis í gildi á Breiðafirði og fram til hádegis á Ströndum og Norðurlandi vestra.

Hiti á landinu verður tvö til sjö stig, en hiti verður um frostmark norðvestantil.

„Á morgun snýst í suðvestan stinningskalda eða allhvassan vind á suðurhelmingi landsins með éljum eða skúrum. Hægari vindur og léttir til um landið norðaustanvert og því hinn fallegasti dagur í vændum þar. Hiti víða 0 til 5 stig. Spár eru helst á því að hvassi norðaustan vindstrengurinn verði enn yfir byggðum Vestfjarða á morgun og snjókoma áfram viðloðandi þar.

Á gossvæðinu í dag er útlit fyrir nokkuð vætusaman og þungbúinn dag. Vindáttin er suðaustlæg og mengun frá eldgosinu gæti borist yfir Reykjanesbæ og nágrenni, en mikil óvissa er um styrk þeirrar mengunar,“ segir á vef Veðurstofunnar.

Veðurhorfur á landinu næstu daga

Á þriðjudag: Suðvestan 10-18 m/s og él eða skúrir á suðurhelmingi landsins. Hægari vindur og léttir til um landið norðaustanvert. Hiti 0 til 5 stig. Norðaustan stormur með snjókomu á Vestfjörðum.

Á miðvikudag: Breytileg átt 5-13. Skýjað með köflum og dálítil él á víð og dreif. Frost 0 til 5 stig. Rigning eða slydda syðst á landinu seinnipartinn og frostlaust þar.

Á fimmtudag: Norðaustan 13-20, slydda eða snjókoma og vægt frost. Austlægari og rigning við suðurströndina með hita að 5 stigum. Úrkomulítið á Vesturlandi.

Á föstudag: Norðan 8-15 og él, en bjartviðri sunnan heiða. Frost 0 til 4 stig.

Á laugardag: Fremur hæg breytileg átt og víða þurrt og bjart veður. Frost 0 til 6 stig.

Á sunnudag: Austan- og suðaustanátt og víða snjókoma eða slydda með köflum.