Líkur á slyddu og snjó­komu á Vest­fjörðum

Í hugleiðingum veðurfræðings á Veðurstofunni segir að þaulsetin og víðáttumikil lægð við norðaustanvert landið beini norðlægri átt yfir landið norðvestanvert með talsverðri úrkomu.

Búast megi við rigningu á láglendi en á norðanverðum Vestfjörðum og Ströndum séu líkur á slyddu eða snjókomu við sjávarmál. Draga eigi úr úrkomu á mánudaginn og útlit er fyrir að veðrið verði svipað á morgun.

„Á sunnan- og austanverðu landinu verður vindur hins vegar mun hægari um helgina, skýjað með köflum, en dálítil væta á stöku stað,“ segir á vef Veðurstofunnar.

Veðurhorfur á landinu næstu daga:

Á morgun:

Norðan 8-15 m/s norðvestantil með rigningu á láglendi, en slyddu eða snjókomu til fjalla. Hægari vindur sunnan- og austantil og sums staðar dálítil væta, einkum austast. Hiti 4 til 11 stig, kaldast á Vestfjörðum.

Á mánudag:

Norðaustan 8-13 norðvestantil, annars hægari vindur. Rigning með köflum, en úrkomulítið um landið sunnanvert. Hiti breytist lítið.

Á þriðjudag:

Austlæg átt 8-15 og fer að rigna, fyrst sunnantil. Hiti 5 til 12 stig, svalast norðvestanlands.