Sí­fellt erfiðara að sjá fyrir upp­haf eld­goss

Magnið af kviku sem nú hefur safnast fyrir undir Svartsengi er nú farið að nálgast það magn sem var þar fyrir síðast eldgos. Ef kvikusöfnun heldur áfram á sama hraða er talið að gosið geti á ný í næstu viku og að fyrirvarinn verði skammur.

„Það er algjörlega háð því hvar gosið kemur upp. Ef það kemur upp við Sýlingarfell þá getur það bara verið mjög stuttur fyrirvari. Innan við hálftími og ef það er vont veður þá verður jafnvel erfitt að sjá þá,“ segir Benedikt Ófeigsson jarðeðlisfræðingur hjá Veðurstofu Íslands.

Stysta leiðin fyrir kvikuna við Sýlingafell

Eins og staðan er núna er talið líklegast að eldgosið komi upp á einu af þremur svæðum á Sundhjúkagígaröðinni.

„Það er náttúrulega langlíklegast að það gjósi bara við Sýlingarfell. Þar er stysta leiðin fyrir kvikuna og auðveldast fyrir hana að komast upp en eins og við höfum séð þá getur þetta farið eftir kvikuganginum og endað þarna við Hagafell kannski og jafnvel ólíklegri möguleiki en alls ekki útilokaður að það fari suður fyrir varnargarðana og í átt að Grindavík og jafnvel inn fyrir Grindavík,“ sagði hann.

Svartsengi ólíklegur kostur

Benedikt telur ólíklegt að það gjósi í Svartsengi en það geti þó gerst.

„Ef að til eldgos kemur í Svartengi þá mun það mjög líklega hafa mun lengri aðdraganda heldur en þennan hálftíma. Það mun taka, við höfum metið það, kannski fjóra til sjö klukkutíma allavega fyrir kviku að brjóta sér leið af þessu fimm kílómetra dýpi og upp á yfirborð bara beint upp í Svartsengi,“ sagði hann.

Merkin verði veikari eftir því sem atburðum fjölgar

Svæðið er vaktað vel og fylgst með ákveðnum merkjum sem gefa til kynna þegar stutt er í eldgos.

„Það er búið að losa svo mikið af spennu að við erum ekki sjá mikið af stórum skjálftum. Það er þessi ákafa virkni þar sem eru mjög margir skjálftar á stuttum tíma og svo fara þeir að færa sig eftir því sem kvikan er að færa sig,“ sagði hann.

„Sömuleiðis sjáum við það á GPS mælum og við höfum líka verið að sjá það á þrýstingsmælum í borholum hjá HS Orku. Þetta eru svona merkin sem við teljum líklegt að við sjáum sem fyrirvara áður en eitthvað byrjar en svo eru þessu merki bara alltaf að verða veikari og veikari eftir því sem atburðunum fjölgar,“ sagði Benedikt.