Breytt hættumatskort vegna sprungna í Grinda­vík

Þetta kemur fram í tilkynningu frá Veðurstofunni. Þar segir að eins og áður sýni kortið mat á hættum sem séu til staðar og nýjum hættum sem gætu skapast með litlum fyrirvara innan tilgreindra svæða. Eingöngu sé lagt mat á hættu innan þessara svæða, en hættur geta leynst utan þeirra.

Enn stendur yfir leit að manni sem talinn er hafa fallið ofan í sprungu í Grindavík á miðvikudag. Fyrr í dag sögðust viðbragðsaðilar hæfilega bjartsýnir á að hann myndi finnast í dag.

Veðurstofan segir að heildarhættumat fyrir svæðin sé óbreytt frá síðasta korti. Þó sé breyting á mati á hættu í tengslum við sprungur innan Grindavíkur.

„Hætta í tengslum við skyndilega opnun á sprungum sem hafa verið kortlagðar innan bæjarmarka Grindavíkur hefur verið metin hærri. Sú breyting hefur hins vegar ekki áhrif á heildarhættumat fyrir Grindavík. Það skal tekið fram að hætta í tengslum við sprungur er bundin við þekkt og afmörkuð svæði innan bæjarmarkanna.“