Ó­missandi jóla­kaffi í sparilegum búningi

Umbúðirnar hafa vakið athygli, enda prýðir þær gullfallegt verk sem myndlistarkonan Linda Ólafsdóttir gerði sérstaklega fyrir tilefnið og líka má sjá í jólaauglýsingum fyrirtækisins. Agga Jónsdóttir á Pipar hannaði umbúðirnar en Kontor Reykjavík sá um allar auglýsingar og samfélagsmiðlaefni.

„Það var engin áskorun að setja sig í jólagírinn í febrúar þegar við byrjuðum að ræða saman um jólabúning Te & Kaffi í ár,“ segir Linda, sem er bæði mikið jólabarn og sérlega mikil kaffikona. 

Þær Kristín María Dýrfjörð, eigandi Te & Kaffi, kynntust fyrir tveimur árum þegar Kristín fékk Lindu til að mála fjölskyldumynd í jólagjöf fyrir mömmu sína.

„Pabbi dó árið 2017 og síðan þá hafa bæst við tvö barnabörn í hópinn okkar,“ segir Kristín. 

„Mig langaði að mamma ætti mynd af öllum hópnum ásamt pabba svo það lá beinast við að teikna hana. Linda gerði það svo vel, eins og allt sem hún gerir, og í kjölfarið langaði mig að vinna meira með henni.“

Þar sem Te & Kaffi er fjölskyldufyrirtæki fannst Lindu viðeigandi að skapa notalega fjölskyldustemningu í jólamyndinni, með smá skírskotun í sjálfa Te & Kaffi fjölskylduna.

„Það var dásamlega skemmtilegt að vinna með Te & Kaffi að jólaútliti þeirra,“ segir Linda. „Við áttum frábært samstarf og það var yndislegt að sjá hvernig Agga og Pipar unnu áfram með myndirnar fyrir mismunandi umbúðir.“

Jólakaffið inniheldur úrvals baunir frá Kólumbíu, Eþíópíu og Kosta Ríka. Þetta er sérstök blanda, einstaklega ilmrík, með gott jafnvægi og dökkt eftirbragð, góða fyllingu og sætt, líflegt ávaxtabragð. Hún er sköpuð fyrir þessi augnablik á aðventunni þegar við tökum okkur stund til að staldra við og njóta, með fólkinu okkar eða bara sjálfum okkur.