Víð­áttu­mikil og öflug hæð yfir Græn­landi stýrir veðrinu

Hæðin mun beina hingað til lands svölum norðan-og norðaustanáttum. Él verður víða á Norður-og Austurlandi en lengst af verður bjartviðri fyrir sunnan og vestan.

Að sögn veðurfræðings eru líkur á að lægðardrag myndist við suðurströndina á sunnudagsmorgun. Þá gæti snjóað um tíma á Suðurlandi og jafnvel við Faxaflóa seinnipartinn. Frost víða 0 til 5 stig en sums staðar frostlaust við sjávarsíðuna.

Í dag er norðlæg átt, 5-13 metrar á sekúndu og él norðan og austan lands. Annars bjart með köflum.

Veðurhorfur á landinu næstu daga:

Á laugardag:

Norðan og norðaustan 3-10 m/s og skýjað með köflum, en dálítil él á Norður- og Austurlandi. Frost 0 til 10 stig, minnst syðst.

Á sunnudag:

Norðaustlæg eða breytileg átt, 5-13 m/s, hvassast norðvestantil og él á víð og dreif, en úrkomulítið á Vesturlandi. Frost 1 til 12 stig, kaldast inn til landsins.

Á mánudag, þriðjudag og miðvikudag:

Útlit fyrir austlægar eða breytilegar áttir með éljum eða jafnvel snjókomu víða um land. Áfram kalt í veðri.

Á fimmtudag:

Líkur á vaxandi suðaustanátt með slyddu eða rigningu á sunnanverðu landinu, en úrkomulítið fyrir norðan. Hlýnandi veður.