Enn tölu­verðar líkur á eld­gosi norðan Grinda­víkur

Þetta segir í nýrri stöðufærslu á vef Veðurstofu Íslands um þróun mála á Reykjanesi.

Þar segir að skjálftavirkni tengd kvikuganginum á svæðinu hafi haldist nokkuð stöðug frá því í gær. Um 2.000 skjálftar hafi mælst síðasta sólahringinn og mesta virknin sé á svæðinu norður af Hagafelli að Sundhnúksgígum.

Mest sé um smáskjálfta  undir einum að stærð en í morgun klukkan 6:35 hafi mælst skjálfti við Hagafell sem var 3,0 að stærð.

„Samkvæmt GPS mælum heldur aflögun áfram en með minnkandi hraða. Nýjustu líkön sem reiknuð hafa verið út frá GPS mælingum og gervitunglagögnum benda ennþá til þess að mesta gliðnunin á kvikuganginum sé norður af Grindavík nálægt Hagafelli. Ef kvika nær að brjóta sér leið til yfirborðs, er því ennþá líklegast að það verði á því svæði,“ segir í færslunni.

„Sigdalurinn yfir kvikuganginum er ennþá virkur þó svo að mælingar sýni að það hafi hægst örlítið á siginu á milli daga. Nú sýna GPS mælar sem staðsettir í og við Grindavík nærri miðju sigdalsins sýna um það bil 3-4 cm sig á milli daga.“