Fóru yfir frábæran feril Helga en Teitur fagnar því að fá loksins fersk egg

„Þetta er svolítið andlit Stólanna finnst mér,“ sagði Stefán Árni Pálsson, stjórnandi Körfuboltakvölds, er þeir félagar horfðu á myndir af Helga taka við verðlaunum frá Tindastóli.

„Alltaf sami klúbburinn, aldrei farið neitt, jafnvel þegar þeir duttu niður í fyrstu deild þá hafa nú örugglega einhverjir verið að gogga í hann,“ bætti Ómar Örn Sævarsson við áður en Teitur Örlygsson greip boltann.

„Þetta er ofboðslegur karakter og mikið andlit,“ sagði Teitur. „Hann kom alltaf tilbúinn á æfingar og gerði það að verkum að intesity-ið á æfingunum varð betra. Það vita það allir að um leið og æfingalevelið fer upp þá verður liðið bara betra. Svoleiðis leikmenn eru bara ómetanlegir.“

Þrátt fyrir að körfuboltinn á Íslandi hafi þarna verið að missa frábæran leikmann var Teitur þó nokkuð sáttur við það að Helgi væri búinn að leggja skóna á hilluna frægu.

„Annars er ég mjög sáttur við þetta því síðustu ár hefur Helgi alltaf fært mér og vini mínú Grindavík egg úr Drangey, sem eru bara bestu svartfuglsegg í heimi eins og fólk þekkir. Síðustu ár hafa Stólarnir verið svo góðir að þeir hafa verið að spila langt fram á vor þannig eggin hafa verið bara eiginlega stropuð þegar við fáum þau frá Helga. En núna fæ ég aftur fersk og ný svartfuglsegg frá Helga,“ sagði Teitur sáttur.

Strákarnir héldu svo áfram að ræða um Helga Rafn og sýndu meðal annars mynd af honum með LeBron James, einum besta körfuboltamanni sögunnar, en innslagið í heild sinni má sjá í spilaranum hér fyrir neðan.