Vill dæma þá í fangelsi sem gerast sekir um samráð

„Nú liggur krafa sam­kvæmt fjár­lögum ef ég skil þetta rétt að Sam­keppnis­eftir­litið skeri kostnað sinn niður um 24 milljónir. Þetta er gjör­sam­lega galið enda hefur Sam­keppnis­eftir­litið sýnt og sannað hversu gríðar­lega mikil­vægt það er ís­lenskum neyt­endum,“ segir Vil­hjálmur Birgis­son, sem gerir málinu í skil á sam­fé­lags­miðlinum Face­book.

Hann segir ekki þurfa að leita lengra aftur að dæmum um mikil­vægi Sam­keppnis­eftir­litsins en til sam­ráðs skipa­fé­laganna Eim­skips og Sam­skips. Vil­hjálmur segir alls ekki ó­lík­legt ef Sam­keppnis­eftir­litið hafi rétt fyrir sér þá sé hér um að ræða einn stærsta glæp gagn­vart neyt­endum sem fram­kvæmdur hafi verið hér á landi.

„Rétt að minna á sektar­greiðslur vegna Sam­skips nema 4,2 milljörðum og sáttar­greiðsla Eim­skips nam 1,5 milljörðum og saman­lagt mun því renna til ríkis­sjóðs 5,7 milljarðar. Eftir mínum upp­lýsingum þá hefur SKE sektað vegna brota á sam­keppnis­lögum fyrir tæpa 20 milljarða og því ó­skiljan­legt að ekki sé lagt meira fé til að efla SKE.“

Segir sér­hags­muna­hópa vilja þrengja að eftir­liti

Vil­hjálmur minnir á að Sam­keppnis­eftir­litið hafi sektað fjöl­mörg fyrir­tæki vegna brota á sam­keppnis­lögum. Hann segir mikil­vægt að allir viti að brot á sam­keppnis­lögum bitni illi­lega á neyt­endum og heimilum þessa lands.

Hann segir að á sama tíma og stjórn­völd leggi til niður­skurð hjá Sam­keppnis­eftir­litinu hér þá séu stjórn­völd í Sví­þjóð að leggja til 20 prósent aukningu á fjár­fram­lagi til eftir­litsins þar. Þá segir Vil­hjálmur að meira að segja Joe Biden, Banda­ríkja­for­seti, vilji auka fjár­heimildir til eftir­litsins þar í landi.

„Það blasir við sér­hags­muna­hópar í ís­lensku sam­fé­lagi vilja þrengja eins mikið að SKE eins og kostur er, enda hræðast þeir SKE en mikil­vægt að í svona fá­keppnis­landi eins Ís­landi verður að vera öflugt Sam­keppnis­eftir­lit þar sem hags­munir neyt­enda verði tryggðir fyrir brotum á sam­keppnis­lögum.“

Vil­hjálmur segist skora á stjórn­völd og Al­þingi að efla og tryggja Sam­keppnis­eftir­litinu nægt fjár­magn til að auka til muna eftir­lit með sam­keppnis­brotum. Enda séu gríðar­legir hags­munir í húfi fyrir ís­lenska neyt­endur. Hann segir aukið fjár­magn til eftir­litsins muni skila sér marg­falt til baka fyrir ís­lenska neyt­endur og sam­fé­lagið í heild.

Þá bætir Vilhjálmur við að hann vilji frekar sjá öðrum viðurlögum beitt í slíkum málum en sektargreiðslum.

„Enda óttast ég að það séu neytendur sem á endanum borgi þessar sektir. Það á að dæma þá aðila sem verða uppvísir að stórfeldum brotum á samkeppnislögum til fangelsvistar og einnig að útiloka þá aðila sem koma að svona brotum frá stjórnun fyrirtækja.“