101 sm lax úr Eystri Rangá

Það tókst loksins að rjúfa þennan múr í gær þegar 101 sm fallegum og þykkum hæng var landað. Eins og myndin ber með sér er þessi lax ekki leginn svo hann sýnir og sannar að ennþá er lax að ganga í Rangárnar. Veiðimenn sem hafa verið við veiðar í september hafa bæði séð og verið að veiða laxa sem eru nýlega gengnir í ánna. Þetta á bæði við um Eystri Rangá og Ytri Rangá. Varðandi stóru hængana sem hafa verið að sýna sig þá þegja flestir þunnu hljóði yfir því hvar þeir eru að sjá þá enda margir sem fara oftar en einu sinni í haustveiðina og vilja þess vegna eiga séns á að ná þeim í næstu ferð.