„Það verða ein­hverjir sem munu horfa á sig í sjón­varpinu öskra á barnið sitt“

Þættirnir verða frumsýndir í byrjun næsta mánaðar og fjalla þeir um börn í íþróttum, og kannski ekki síst foreldra barna í íþróttum.

Sindri Sindrason hitti Lillý á Víkingsvellinum í Fossvoginum og spjallaði við hana um þættina í Íslandi í dag á Stöð 2.

„Á öllum stigum, þegar þú talar við börnin þá er svarið við spurningunni af hverju þau eru í þessu, þá er svarið. Það eru vinirnir og félagsskapurinn. Það segir enginn, ég er í þessu til að vinna leik,“ segir Lillý og heldur áfram.

„Við foreldrarnir eru stundum bara að taka þetta af börnunum með því að öskra þannig að þau vilji ekki vera með. Þetta er þeirra leikur.“

Lillý hefur verið eins og fluga á vegg á krakkamótum sumarsins hér á landi og mögulega eiga einhverjir foreldrar eftir að sjá sjálfan sig í sjónvarpinu og skammast sín.

Hefur séð þetta á öllum mótum

„Við erum að fara sýna foreldra sem voru á mótum annað hvort í fyrra eða í sumar. Þetta fólk veit ekki af því að það var myndað. Við erum ekki að blörra andlitin því þetta eru ekki alveg þannig atvik, að þau séu svo hræðileg að þér finnist þess þurfa. Við erum að taka almenna hegðun foreldra, sem er svolítil aggresíf sem ég hef séð á öllum mótum,“ segir Lillý sem hefur fengið leyfi allra mótshaldara til að sinna verkefninu.

„Við erum í almannarými og pössum upp á að það að fylgja öllu sem þarf að fylgja. En það verða einhverjir sem munu horfa á sig í sjónvarpinu öskra á barnið sitt,“ segir Lillý.

Hér að neðan má sjá brot úr þætti gærkvöldsins en hægt er að horfa á innslag Íslands í dag í heild sinni á Stöð 2+.