Snöruðu Héðni upp á gamla stallinn við Hring­braut

Líkt og Vísir greindi frá á sínum tíma var styttan tekin niður einkum til þess að endurgera stöpul hennar, sem var svo gott sem ónýtur. Á meðan var Héðinn geymdur á Árbæjarsafninu.

Styttan er merkileg eins og fyrirmyndin, Héðinn Valdimarsson, sem var alþingismaður og formaður Verkamannafélagsins Dagsbrúnar. Héðinn var helsti forystumaður byggingarsamtaka verkamanna sem gengust fyrir byggingu verkamannabústaðanna við Hringbraut – þá merkilegu framkvæmd.

Því var lýst yfir á sínum tíma að jafnframt yrði flikkað upp á styttuna, hún hreinsuð og gerð fín. Upphaflega átti Héðinn að mæta aftur á sinn gamla stað ári síðar en svo varð ekki.

Styttan er í eigu Húsfélags alþýðu en Listasafn Reykjavíkur var ráðgefandi vegna aðgerðanna. Kristín Róbertsdóttir, formaður Húsfélags alþýðu, sagði við Vísi árið 2018 að styttan væri sú eina í eigu félagsins.

Hún sagðist telja að listamaðurinn Sigurjón Ólafsson, sem gerði styttuna, hafi haft sem fyrirmynd ljósmynd af Héðni þegar hann hélt ræðu á 1. maí á svölum eins bústaðanna. „Þá voru 1. maí fundir haldnir í portinu hjá verkamannabústöðunum,“ sagði Kristín.