Enski boltinn

United hafnaði mettil­boði í Earps

Smári Jökull Jónsson skrifar
Earps lék alla sjö leiki Englands á heimsmeistaramótinu sem lauk á sunnudag.
Earps lék alla sjö leiki Englands á heimsmeistaramótinu sem lauk á sunnudag. Vísir/Getty

Manchester Untied hefur hafnað tilboði í landsliðsmarkvörðinn Mary Earps sem hefði gert hana að dýrasta markverði allra tíma. 

Mary Earps er landsliðsmarkvörður Englands og var valinn besti markvörður heimsmeistaramótsins í Ástralíu og Nýja Sjálandi sem lauk um síðustu helgi. Þá var hún einnig valinn besti markvörður síðasta árs á verðlaunaafhendingu FIFA í febrúar.

Earps gekk til liðs við Manchester United frá Wolfsburg fyrir fjórum árum og hefur leikið hverja einustu mínútu í deildarleikjum United síðan þá. 

Skysports greinir frá því að United hafi í dag hafnað mettilboði í Earps frá ónefndu liði. Ef tilboðinu hefði verið tekið hefði Earps verið dýrasti markvörður allra tíma í kvennaboltanum.

Earps lék alla sjö leiki Englands á heimsmeistaramótinu og varði meðal annars vítaspyrnu frá Jenni Hermoso í úrslitaleik mótsins en þar tapaði England fyrir Spáni. 

Earps á eitt ár eftir af samningi sínum við United og verður forvitnilegt að sjá hvort hún verður ennþá leikmaður félagsins þegar enska úrvalsdeildin fer af stað þann 1. október.

HM 2023 í Ástralíu og Nýja-Sjálandi

Mest lesið


Fleiri fréttir

Sjá meira


×

Mest lesið