Björg­vin Karl gat ekki klætt sig í sokkana rúmri viku fyrir heims­leikana

Björgvin var að keppa á sínum tíundu heimsleikum í röð en endaði að lokum í ellefta sæti sem var næstbesti árangur Íslendings í aðalflokkunum í ár en Katrín Tanja Davíðsdóttir náði sjöunda sætinu hjá konunum.

Björgvin Karl hefur glímt við bakmeiðsli í allt sumar og það háði honum sérstaklega í lyfingaæfingunni á leikunum í ár. Eftir hana sagði Björgvin frá því í eftirminnilegu viðtali að hann það hafi verið peningarnir sem fengu hann til að pína sig til að klára heimsleikana.

Björgvin taldi sig samt þurfa að útskýra stöðu sína betur og fór yfir heimsleikana í fimm færslum á Instagram reikningi sínum.

Björgvin sagði þar frá því að hann hafi fundið fyrst fyrir bakinu fyrir lokagreinina á undanúrslitamótinu þar sem hann tryggði sér farseðilinn á heimsleikana.

Björgvin sagði að meiðslin hafi tekið sig aftur upp í lokaundirbúningnum fyrir leikana sem þýddi að hann gat lítið sem ekkert æft lyftingarnar.

Brotnaði niður og ætlaði að hætta við þátttöku

Björgvin sagðist hafa brotnað niður þegar ekkert gekk og að hann hafi íhugað það að draga sig úr keppni vegna meiðslanna.

„Ég þakklátur fyrir að hafa frestað því um einn dag því það var eins og eitthvað hafi smollið um nóttina. Bakið var mikið betra og ég komst yfir vonbrigðin frá deginum áður,“ skrifaði Björgvin Karl Guðmundsson.

„Ég var ekki að lyfta því sama og ég get en sú staðreynd að ég gat gert þetta allt níu dögum fyrir heimsleikana var eins og kraftaverk miðað við það að ég gat ekki klætt mig í sokkana tveimur dögum fyrr,“ skrifaði Björgvin Karl.

Hamaðist í þrjá og hálfan tíma á bakinu hans

Björgvin Karl fer yfir keppnina og hvernig hann varð mjög slæmur í bakinu eftir fimm kílómetra hlaupið. „Á laugardagskvöldinu þá var Andrew í yfirvinnu að taka bakið í gegn og ég tel að hann hafi á endanum komist að rót vandans. Hann eyddi líklega þremur og hálfum klukkutíma á hótelinu að grafa niður í það sem mér fannst vera mænan mín. Þetta var svo sannarlega ekki þægilegt en eftir það gat ég lyft 52 kílóum án þess að finna neitt,“ skrifaði Björgvin.

Björgvin Karl gerir síðan upp helgina í lokafærslu sinni. Hann náði að klára lokadaginn þótt að hann hafi dottið niður um nokkur sæti í lokin.

„Þrátt fyrir allt það sem gekk á í síðustu viku þá er ég ánægður í hjarta mínu. Ég segi það alveg satt,“ skrifaði Björgvin.

„Ég hef verið með sama þjálfarann öll tíu árin mín í þessu sporti og hann hefur haft rosalega mikla trú á mér frá degi eitt. Það var í gegnum hann sem ég kynntist Andrew Martin. Þekking og hæfni hans er eins góð og þú finnur og teymið í kringum mig er ástæðan fyrir því að ég gat klárað þessa keppni,“ skrifaði Björgvin.

„Ég hefði svo auðveldlega getað hætt keppni og ég er viss um að allir hefðu skilið það. Ég vil líka þakka sjálfum mér fyrir að trúa á mig sjálfan og pína mig í gegnum sársaukann,“ skrifaði Björgvin sem ætlar að taka sér gott frí og láta skoða bakið betur.

„Lokasæti mitt er ekkert til að monta mig af miðað við hvar ég hef endað undanfarin níu ár. Ég er samt mjög stoltur af því að ég var að berjast um verðlaunasætið mest alla vikuna. Ég sé ekki eftir neinu og ég mun sjá ykkur aftur á keppnisgólfinu í framtíðinni,“ skrifaði Björgvin.

Það má sjá allar þessar fimm færslur Björgvins hér fyrir ofan og neðan.