Telja að Barcelona-stjörnur Noregs verði bekkjaðar gegn Sviss

Það er alltaf erfitt að mæta heimaþjóð í fyrstu umferð stórmóts en samt sem áður var búist við því að Noregur myndi vinna Nýja-Sjáland og það jafnvel nokkuð örugglega. Noregur er sem stendur í 11. sæti heimslista Alþjóðaknattspyrnusambandsins á meðan Nýja-Sjáland er í 22. sæti.

Norska liðið er stútfullt af hæfileikaríkum leikmönnum. Má þar nefna:

• Tuva Hansen (Bayern München)
• Maren Mjelde (Chelsea)
• Guro Reiten (Chelsea)
• Frida Leonhardsen-Maanum (Arsenal)
• Ingrid Syrstad Engen (Barcelona)
• Caroline Graham Hansen (Barcelona)
• Ada Hegeberg (Lyon)

Það breytti því ekki að Nýja-Sjáland var betri á öllum sviðum þegar liðin mættust og vann á endanum sannfærandi 1-0 sigur.

Riise er vægast sagt ósátt með frammistöðu síns liðs og ætlar að hrista upp í liðinu gegn Sviss á morgun. Samkvæmt heimildum NRK, norska ríkisútvarpsins, munu þær Ingrid Syrstad Engen og Caroline Graham Hansen byrja leik morgundagsins á bekknum.

Noregur verður að vinna Sviss eða hið minnsta ná í stig ætli liðið sér að eiga möguleika á að komast upp úr riðlinum og í 16-liða úrslit heimsmeistaramótsins.