West Ham kveður Declan Rice með tilfinningaþrungnu myndbandi

Rice hefur leikið með West Ham í ensku úrvalsdeildinni síðan 2017 og verið fyrirliði liðsins síðan 2019, þegar hann var aðeins tvítugur að aldri. Hann hafði áður verið í unglingaakademíu West Ham frá 14 ára aldri, eftir að Chelsea taldi sig ekki hafa frekari þörf á kröftum hans.

Rice lék alls 245 leiki fyrir West Ham í öllum keppnum og skoraði í þeim 15 mörk. Það má segja að hátindinum hafi verið náð í vor þegar West Ham lagði Fiorentina í úrslitaleik Sambandsdeildarinnar og landaði fyrsta stóra titli félagsins í 43 ár.

Stuðningsmenn liðsins kveðja Rice eflaust með tár á hvarmi, en West Ham birti þetta myndband í morgun þar sem honum er þakkað fyrir minningarnar.