Fer frá Barbie til Narníu

Netflix greindi frá því í lok árs 2018 að fyrirtækið hefði gert samning við The C.S Lewis Company um að setja allar Narníu-bækur Lewis á stóra skjáinn. Það er í fyrsta skiptið sem fyrirtæki fær réttinn að öllum sjö bókunum.

Orðrómur hefur gengið um mögulegan leikstjóra í þónokkurn tíma og nú hefur loks verið staðfest að Gerwig muni leikstýra myndunum, allavega fyrstu tveimur. Þá mun hún einnig skrifa handritið að þeim. Hins vegar er ekki enn vitað hver eða hverjir munu leikstýra hinum fimm.

Reyna aftur við Narníu

Narníu-sögur Lewis voru fyrst aðlagaðar að stóra skjánum í þríleik sem kom út á árunum 2005 til 2010. Fyrsta myndin, Ævintýralandið Narnía: Ljónið, nornin og skápurinn, naut mikilla vinsælda og skilaði næstum 750 milljónum Bandaríkjadala í kassann.

Seinni myndirnar tvær, Kaspían konungsson og Sigling dagfara, voru ekki alveg jafn vinsælar og sú fyrsta en höluðu þó báðar inn rúmum 400 milljónum Bandaríkjadala. Nú á að reyna að endurtaka leikinn og fá vinsælan leikstjóra á uppleið til liðs við verkefnið.

Barbie-mynd Gerwig kemur út seinna í mánuðinum en leikstjórinn hefur greint frá því að hún muni að öllum líkindum ekki gera aðra mynd um leikfang eftir að nýja Barbie-myndin kemur út.

„Það þyrfti að vera eitthvað sem væri með skrítnum öngli, sem manni líður eins og fari inn að beinmergi,“ sagði hún í viðtali við New Yorker nýlega. „Ég veit ekki hvort það er til dúkka sem einhver er reiður út í.“

„Greta og ég höfum mjög meðvitað verið að byggja feril hennar,“ sagði Jeremy Barber, umboðsmaður Gerwig, í viðtali við New Yorker. „Metnaður hennar er ekki að verða stærsti kvenleikstjórinn heldur stór stúdíóleikstjóri. Og Barbie var hugverk sem hún tengdi við.“