Tekur upp hanskann fyrir ráðherra og segir bannið óumflýjanlegt

Formaður atvinnuveganefndar hefur boðað til fundar með ráðherra á föstudag klukkan 11.

Ákvörðun Svandísar Svavarsdóttur matvælaráðherra um tímabundið hvalveiðibann er umdeild hér á Íslandi en hún hefur líka fangað athygli umheimsins eins og sést á umfjöllunum stóru fjölmiðlanna úti í heimi á borð við Guardian, Al Jazeera, Independent og Reuters.

Andrés Ingi skrifaði á sínum tíma ályktun með Svandísi ályktun um bann við hvalveiðum sem var samþykkt á Landsfundi VG árið 2015 þegar Andrés var enn í flokknum. Hann er ánægður með útspil Svandísar.

„Þetta er skynsamleg niðurstaða og í rauninni það eina sem hægt var að gera. Það hefur lengi legið fyrir að hvalveiðar geta ekki staðist þær kröfur sem við gerum til aflífunar á dýrum í nútímasamfélagi þannig að ég hefði nú viljað sjá þetta gerast fyrr en þetta var óhjákvæmilegt.“

Hann segir að tímasetning bannsins skipti ekki öllu máli í stóra samhenginu.

„Þessi rekstur hefur náttúrulega verið allur í óvissu síðustu vikur, það var ekki fyrr en fyrir fjórum dögum að þau [Hvalur hf.] fengu yfir höfuð starfsleyfi fyrir aðstöðunni þarna í Hvalfirði en hluti af töfinni er líka að Hvalur hf. barðist um á hæl og hnakka gegn þessari eftirlitsskýrslu MAST í allan vetur og tafði væntanlega birtingu hennar töluvert. Auðvitað hefði verið betra að fá þessa niðurstöðu fyrr en ég held það breyti ekki öllu.“

Andrés þekkir vel til VG-liða og kjósendahóps hans. Hann telur kjósendur flokksins vera ánægða með bannið.

„Það sem mér sýnist er að fólk sé bara dálítið ánægt með sína konu, þarna stóð hún með náttúrunni og það er auðvitað það sem ráðherrar eiga að gera,“ segir Andrés og bætir við:

„Ég bara vona að hún hafi stuðning innan flokksins til að fylgja þessu eftir núna í haust af því að það er nú stóra verkið sem er framundan að gera þetta bann varanlegt.“

Segir gagnrýnina mest til heimabrúks

Óli Björn Kárason, þingflokksformaður Sjálfstæðisflokksins, sagði í samtali við fréttastofu í dag að ákvörðunin væri til marks um óeðlilega og ósanngjarna stjórnsýslu. Andrés telur að það sé ekki djúpt á þeim ágreiningi sem ríkir um málið innan ríkisstjórnarinnar heldur sé gagnrýnin mest til heimabrúks. Andstaðan sé þó mest innan Sjálfstæðisflokks.

„Ég held að hagsmunatengslin í Sjálfstæðisflokkinn telji töluvuert. Þarna er náttúrulega verið að snerta við pyngjunni hjá fólki sem á lóðbeinan aðgang að Valhöll, það gæti haft eitthvað að segja. En hugmyndafræðilega, þá held ég að það sé ekki djúpt á þessu.“

Þú heldur ekki að þetta verði til þess að ríkisstjórnin riði til falls?

„Ég held að þessi stjórn vilji vera saman, bara sama hvað og dæmin síðustu sex árin sanna það,“ segir Andrés Ingi Jónsson, þingmaður Pírata.

Boðar nefndarmenn á fund í atvinnuveganefnd vegna málsins

Stefán Vagn Stefánsson, formaður atvinnuveganefndar Alþingis, hefur boðað nefndarmenn til fundar á föstudag til að taka þetta mál fyrir og mun matvælaráðherra sitja fyrir svörum.

„Það er bara mjög mikilvægt að nefndinni gefist tækifæri til þess að spyrja ráðherrann milliliðalaust um þessa ákvörðun, hvernig hún var tilkomin því það er ekkert langt síðan ráðherrann sat fyrir sömu nefnd og sagði að það væru ekki lagalegar heimildir til að stöðva þessar sömu veiðar,“ segir Stefán.

Þá veltir hann því fyrir sér hvort ekki þurfi að koma til móts við starfsfólkið.

„Hér eru um tvö hundruð störf að ræða sem eru núna að falla niður og hvort að ákvörðun sem ríkið tekur eins og er gert núna - það er ríkið sem er að taka þessa ákvörðun núna - að slaufa þessum störfum hvort það þurfi að koma með einhverjar mótvægisaðgerðir inn í samfélagið á móti,“ segir Stefán.