Gylfi Þór aflar fjár fyrir Rauða krossinn

Hann tekur við stöðunni af Björgu Kjartansdóttur, sem var nýlega ráðin til Alþjóðasambands Rauða krossins í Genf til sex mánaða, en hún hefur sinnt starfinu síðan árið 2018.

Gylfi Þór er vel kunnugur starfi Rauða krossins og landsþekktur fyrir störf sín fyrir félagið. Hann sá um rekstur sóttvarnarhúsa Rauða krossins í kórónuveirufaraldrinum og hefur auk þess sinnt sjálfboðastörfum í neyðarvörnum fyrir félagið í áraraðir.

Hann starfaði áður hjá félags- og vinnumarkaðsráðuneyti sem aðgerðarstjóri vegna komu flóttafólks frá Úkraínu. 

Um árabil starfaði hann á sviði fjölmiðlunar, sem dagskrárgerðarmaður í útvarpi og síðar sem auglýsinga- og markaðsstjóri miðla á borð við Viðskiptablaðið, DV, Morgunblaðið og fleiri til. Gylfi Þór hefur einnig starfað sem framkvæmdastjóri mbl.is og Eiðfaxa ásamt stöfum í ferðaþjónustu og víðar.