Spilaði kvið­slitinn nær allt tíma­bilið

Hinn þrítugi Son átti langt því frá sitt besta tímabil þegar liðið endaði í 8. sæti ensku úrvalsdeildarinnar í knattspyrnu. Son var mikið gagnrýndur fyrir spilamennsku sína en skoraði þó 10 mörk og lagði upp sex í 36 deildarleikum.

Framherjinn hefur nú greint frá því að hann hafi verið að glíma við kviðslit nær allt tímabilið. Hann fór loks í aðgerð eftir að tímabilinu lauk.

„Ég velti fyrir mér hvort ég ætti yfir höfuð að segja frá þessu en ég var að spila í gegnum sársauka í átta til níu mánuði. Ég gat ekki haldið áfram lengur svo ég ákvað að fara í aðgerð. Ég var að spila af 60 prósent getu,“ sagði Son í viðtali.

Son hefur verið algjör lykilmaður hjá Tottenham undanfarin ár og verður það eflaust hjá nýjum þjálfara liðsins, Ange Postecoglou. Hvað þá ef hann verður loks heill heilsu.