Liverpool vill fá miðjumann Dýrlinganna

Southampton keypti Lavia frá Manchester City fyrir 12,5 milljónir punda fyrir þetta tímabil. Og þrátt fyrir að Dýrlingunum hafi gengið illa í vetur og séu fallnir hefur Lavia heillað með frammistöðu sinni. Hann var meðal annars valinn í belgíska landsliðið og lék sinn fyrsta landsleik.

Liverpool og Chelsea eru meðal liða sem hafa sýnt Lavia áhuga en talið er að þau ætli að gera talsverðar breytingar á miðjuskipan sinni.

Talið er að verðmiðinn á Lavia sé fjörutíu milljónir punda, eitthvað sem Liverpool og Chelsea ættu bæði að ráða léttilega við.

Í samningi Lavias við Southampton er ákvæði þess efnis að City geti keypt hann ef félagið jafnar tilboð annarra félaga í hann.