Lygni þingmaðurinn ákærður fyrir fjárþvætti og svik

Santos er ákærður í þrettán liðum. Sjö ákæruliðir snúa að fjársvikum, þrír af fjárþvætti, einn af stuldi úr opinberum sjóðum og tveir að lygum að þinginu.

Áhugasamir geta lesið ákæruna hér á vef dómsmálaráðuneytis Bandaríkjanna.

Santos gaf sig fram í morgun og verður færður fyrir dómara seinna í dag. Í frétt New York Times segir að hann standi frammi fyrir allt að tuttugu ára fangelsi vegna alvarlegasta ákæruliðsins.

Breon Peace, saksóknari í New York, segir í yfirlýsingu að Santos hafi notað lygar til að komast á þing og fylla vasa sína af seðlum. Hann hafi notað kosningasjóði sína í einkaþágu, sótt ólöglega um atvinnuleysisbætur og logið að þinginu.

Anne T. Donnelly, umdæmasaksóknari, segir í sömu yfirlýsingu að árið 2020, þegar Covid herjaði á heiminn, hafi Santos sótt um og fengið atvinnuleysisbætur. Hann hafi þó bæði verið í vinnu á þessum tíma og verið að bjóða sig fram til þings.

Þá segir hún að Santos hafi sýnt sambærilega hegðun í seinni atlögu sinni að þingi og þá hafi hann notað fjárframlög til framboðs hans meðal annars til að greiða eigin skuldir og kaupa dýran fatnað.

Í stórum dráttum snúast ákærurnar gegn Santos um þrjú atriði.

Það fyrsta er að hann hafi notað kosningasjóði sína í einkaþágu. Í september í fyrra, er hann var í framboði, stýrði hann félagi sem hann notaði til að svíkja fé frá bakhjörlum sínum. Þá er hann sakaður um að hafa fengið þekktan innherja í Repúblikanaflokknum til að biðja bakhjarla flokksins um fjárveitingar sem áttu að fara í kosningasjóð Santos.

Santos færði minnst fimmtíu þúsund dali sem hann fékk í kosningasjóð sinn inn á eigin persónulegan reikning en hann reyndi að fela færslurnar. Þá fjármuni notaði hann svo í einkagjörðum.

Því næst snúa ákærurnar gegn Santos að því að hann hafi árið 2020 sótt um og fengið atvinnuleysisbætur. Á þeim tíma var hann í vinnu hjá fjárfestingafélagi og með um 120 þúsund dali í laun á ári. Hann sótti um bætur í júní og sagðist hafa verið atvinnulaus frá því í mars, þó hann hefði verið í vinnu frá því í febrúar, samkvæmt saksóknurum.

Hann er sakaður um að hafa sótt sér rúmlega 24 þúsund dali í bætur sem hann átti ekki rétt á.

Þriðja atriðið snýr að því að Santos hafi logið að þinginu varðandi fjármál hans og kosningasjóð hans. Eins og allir þingmenn á Santos að veita þinginu upplýsingar um fjármál sín og eigur og tengsl og vottaði hann að þær upplýsingar sem hann veitti, bæði þegar hann bauð sig fram 2020 og 2022, að þær upplýsingar sem hann veitti væru réttar.

Saksóknarar segja að árið 2020 hafi Santos sagt ósatt um fjármál sín og tekjur sem hann fékk. Hann er sakaður um að hafa gert of mikið úr tekjum sem hann fékk frá einu fyrirtæki og ekki sagt frá tekjum frá öðru.

Fyrir kosningarnar í fyrra er Santos einnig sakaður um lygar um fjármál sína. Hann sagðist hafa fengið 750 þúsund dali í laun frá félagi í hans eigu sem heitir Devolder Organization. Þá sagðist hann einnig hafa fengið á milli einnar og fimm milljóna dala í arð frá félaginu.

Santos sagðist einnig eiga allt að 250 þúsund dali á bók og allt að fimm milljónir dala á sparireikning.

Saksóknarar segja að hann hafi ekki fengið þessi laun eða uppgefinn arð frá Devolder og þar að auki hafi Santos heldur ekki átt uppgefna peninga í bönkum. Þar að auki er hann sakaður um að hafa ekki gefið upp um 28 þúsunda greiðslu frá einu fjárfestingafyrirtæki og um rúmlega tuttugu þúsund dali frá öðru.