Olíu­sjóðurinn vill ekki gera olíu­fé­lag lofts­lags­vænna

Hluthafafundur BP fer fram fimmtudaginn 27. apríl. Norski olíusjóðurinn, einn umsvifamesti fjárfestir heims, á 2,73 prósenta hlut í olíurisanum sem var metinn á 2,8 milljarða dollara við árslok 2022, jafnvirði meira en 384 milljarða íslenskra króna.

Hópur aðgerðasinnaðra hluthafa sem kallar sig Follow This lagði fram ályktunartillögu fyrir fundinn sem felur í sér að BP setji sér markmið um samdrátt í losun gróðurhúsalofttegunda sem séu í samræmi Parísarsamkomulagið. Það kveður á um að hnattrænni hlýnun verði haldið vel fyrir innan tvær gráður og helst eina og hálfa gráðu fyrir lok aldarinnar.

BP dró verulega í land með loftslagsmarkmið sín í febrúar. Fyrirtækið stefndi upphaflega á að draga úr olíu- og gasframleiðslu sinni um fjörutíu prósent á milli 2019 og 2030. Nú er stefna þess að draga úr framleiðslu um fjórðung.

Stjórn BP hvetur hluthafa til þess að fella tillöguna á þeim forsendum að hún sé ekki skýr um hvað fyrirtækið eigi að gera. Reuters-fréttastofan segir að norski olíusjóðurinn ætli að greiða atkvæði gegn tillögunni en hann hafi ekki gefið skýringar á hvers vegna. Hann hefur áður sagst styðja tillögur um umhverfis-, samfélags- og stjórnunarmál af þessu tagi í sumum tilfellum en það sé metið í hvert skipti fyrir sig.

Félag norska seðlabankans (NBIM) sem stýrir olíusjóðnum hefur sagst ætla að vera aðgangsharðara við fyrirtæki sem setja sér ekki trúverðug loftslagsmarkmið. Follow This sakar NBIM um að falla á fyrsta prófinu varðandi loftslagsstefnu þess.