Snjókoma fyrir norðan

Bjarki Sigurðsson skrifar 6. apríl 2023 08:29

Það snjóar á Akureyri þennan skírdagsmorgun skíðafólki til mikillar ánægju. Vísir/Bjarki

Suðlæg eða breytileg átt verður í dag og nær þremur til átta metrum á sekúndu. Stöku skúrir eða él, hiti 0 til 7 stig yfir daginn. Vaxandi suðaustanátt í nótt. Snjókoma er á Akureyri en búist er við sól seinni part dags. Úrkomulítið verður á Norður- og Norðausturlandi á morgun. Hiti verður á bilinu fjögur til ellefu stig eftir hádegi.

Í hugleiðingum veðurfræðings Veðurstofunnar segir að búist sé við fremur hægri suðlægri átt í dag með stöku skúrum eða éljum á landinu. Hiti er í kringum frostmark nú í morgunsárið en kemst víða í 5 til 7 stig yfir hádaginn.

Í nótt nálgast lægð með vaxandi suðaustanátt. Allhvasst eða hvasst á morgun og jafnvel stormur suðvestanlands. Þessu fylgir rigning sunnan- og vestantil á landinu og hlýnandi veður.

Áfram suðaustanátt á laugardag, en talsvert hægari vindur. Rigning eða skúrir og milt veður, en yfirleitt þurrt á Norðurlandi.

Veðurhorfur næstu daga:

Á föstudag (föstudagurinn langi):

Gengur í suðaustan 13-23 m/s og hlýnar með rigningu, hvassast um landið suðvestanvert. Úrkomulítið á Norður- og Norðausturlandi. Hiti 4 til 11 stig eftir hádegi.

Á laugardag:

Suðaustan 8-15. Þurrt að kalla norðanlands, annars skúrir, en rigning suðaustantil. Hiti 3 til 10 stig.

Á sunnudag (páskadagur):

Suðaustan og austan 10-18, hvassast við suðurströndina. Rigning með köflum, einkum suðaustanlands, en þurrt um landið norðanvert. Áfram milt í veðri.

Á mánudag (annar í páskum):

Austlæg átt og rigning sunnantil, en víða rigning eða slydda um kvöldið. Kólnandi veður.

Á þriðjudag:

Snýst í suðlæga átt. Rigning eða slydda, en þurrt á Austurlandi. Stöku skúrir eða él sunnan- og vestanlands um kvöldið. Hiti 1 til 5 stig að deginum.

Á miðvikudag:

Útlit fyrir norðaustanátt með rigningu eða slyddu austanlands.

Veður