Fjar­lægðu skráningar­merki af bíl og fengu tvo eftir­lýsta í kaup­bæti

Að því er fram kemur í yfirliti lögreglu segir að eigandi bifreiðarinnar hafi komið út þegar verið var að fjarlægja skráningarmerkið af bílnum. Sá reyndist eftirlýstur og var handtekinn. Annar einstaklingur kom út stuttu síðar og var eftirlýstur vegna sama máls og hinn og var einnig handtekinn.

Lögregla lagði í framhaldinu hald á bifreiðina þar sem grunur leikur á að í henni sé þýfi. Báðir handteknu voru vistaðir í fangageymslum.

Skráningarmerki voru fjarlægð af tveimur öðrum bifreiðum í nótt. Þá bárust lögreglu tilkynningar um líkamsárás í póstnúmerinu 112 og þjófnað úr verslun í póstnúmerinu 108.