Þyrlan kölluð út í þriðja sinn: „Þetta eru óvenjumörg slys“

Þyrlusveitin var fyrr í dag kölluð út vegna vélsleðaslyss á Jarlhettum, suður af Langjökli. 

Sjá einnig: Þyrlan aftur kölluð til vegna vélséðaslyss á Langjökli

Ásgeir Erlendsson, upplýsingafulltrúi Landhelgisgæslunnar, segir að þyrlan muni lenda í Reykjavík á næstu mínútum vegna slyssins á Langjökli. „Það verður væntanlega sama áhöfn sem fer norður,“ segir Ásgeir.

Á Dalvík er um að ræða annað vélsleðaslys. „Ástæða þess að þyrlan er kölluð til er staðsetning slyssins,“ segir Ásgeir jafnframt.

Eru þetta ekki óvenjumörg slys í dag?

„Jú, það hafa sömuleiðis komið upp tvö önnur slys sem við erum ekki með nákvæma staðsetningu á en björgunarsveitir hafa sinnt og ekki krafist aðstoðar Landhelgisgæslu. Þrjú þyrluútköll sama daginn er mjög mikið en það gerist oft þegar það er gott veður og margir á ferli. Þá er líklegra að það verði slys.“

Í morgun varð síðan alvarlegt fjórhjólaslys við Hlöðuvallaveg undir Langjökli. Einn var þá fluttur slasaður með þyrlu Landhelgisgæslunnar.