Blönduósmálið fellt niður á grundvelli neyðarvarnar

Þetta segir Kolbrún Benediktsdóttir varahéraðssaksóknari í samtali við Vísi. Þetta hafi verið niðurstaðan eftir rúmlega tveggja vikna skoðun héraðssaksóknara á málinu. Aðilum málsins var tilkynnt niðurstaðan í dag.

Kolbrún segir það mat embættisins að feðgarnir sem höfðu stöðu sakborninga við rannsókn málsins hafi ekki farið út fyrir takmörk leyfilegrar neyðarvarnar.

Hún vísar til 12. greinar almennra hegningarlaga þar sem segir:

Það verk er refsilaust, sem menn vinna af neyðarvörn, að því leyti sem það hefur verið nauðsynlegt til þess að verjast eða afstýra ólögmætri árás, sem byrjuð er eða vofir yfir, enda hafi ekki verið beitt vörnum, sem séu augsýnilega hættulegri en árásin og tjón það, sem af henni mátti vænta, gaf ástæðu til. Hafi maður farið út fyrir takmörk leyfilegrar neyðarvarnar, og ástæðan til þess er sú, að hann hefur orðið svo skelfdur eða forviða, að hann gat ekki fullkomlega gætt sín, skal honum ekki refsað.

Þeir sem eiga hagsmuni að gæta í málinu hafa þann kost að kæra niðurstöðu héraðssaksóknara til ríkissaksóknara. Komi ekki til þess telst málinu lokið.

Skaut konu til bana

Það var þann 21. ágúst sem maður vopnaður afsagaðri haglabyssu fór inn um ólæstar dyr á heimili fjölskyldu á Blönduósi. Hann var með sjö haglaskot og veiðihníf meðferðis.

Þegar árásarmaðurinn sá að gestir voru á heimilinu fór hann út úr húsinu og fór húsráðandi á eftir honum. Utandyra kom til orðaskipta og átaka sem enduðu með því að árásarmaðurinn skaut húsráðanda í kvið og særði hann alvarlega.

Að því loknu fór árásarmaðurinn inn í húsið og skaut eiginkonu hans í höfuðið, þar sem hún stóð inni í stofu. Hún lést samstundis.

Lögreglan á Norðurlandi eystra tók málið til rannsóknar og komst að þeirri niðurstöðu að atburðarásin hefði verið á þann veg sem að ofan greinir.

Lét lífið í átökunum

Rannsókn lögreglu leiddi í ljós að húsráðandi hafi náð tökum á árásarmanninum þar sem hann hafi verið að hlaða vopnið inni í húsinu. Sonur húsráðanda kom til aðstoðar og náði byssunni af árásarmanninum. Til átaka kom milli þeirra en í ljós kom að árásarmaðurinn var með veiðihníf í vasanum. Átökin enduðu með því að árásarmaðurinn lét lífið.

Réttarkrufning hefur leitt í ljós að dánarorsök árásarmannsins var köfnun vegna þrýstings á háls og brjóst.

Staðreynt hefur verið að sonurinn hringdi fyrsta símtal til neyðarlínunnar og óskaði eftir aðstoð vegna árásarmannsins klukkan 5:27. Lögregla á bakvakt í umdæminu var ræst út sjö og hálfri mínútu síðar. Lögreglan var ekki kominn á vettvang fyrr en 5:53 eða 26 mínútum frá fyrstu aðstoðarbeiðni.

Lögregla segir að rannsókn hafi ekki leitt í ljós hvað nákvæmlega hafi gengið árásarmanninum til. Hann hafi verið einn að verki, allsgáður og átt vinsamleg samskipti við árásarþola fyrir árásina.

Tvisvar hafi tilkynningar borist um ferðir árásarmannsins við heimili árásarþola og nágrenni þar sem hann hafði verið með haglabyssu í fórum sínum, um tveimur vikum áður en hann lét til skarar skríða. Þar hafi hann meðal annars tekið upp myndbönd inn um glugga á húsinu á síma sinn.

Leitaði sér heilbrigðisaðstoðar en fór svo aftur á Blönduós

Byssumaðurinn er sagður hafa afhent lögreglu skotvopn sem skráð voru á hann og leitað sér heilbrigðisaðstoðar. Hinn 12. ágúst 2022 hafi hann hins vegar verið aftur kominn á Blönduós.

Haglabyssan sem notuð var við verknaðinn var skráð í eigu fyrirtækis sem seldi skotvopn og varð gjaldþrota fyrir fimmtán árum síðan. Fram kemur að þrjár byssur hafi enn verið skráðar á fyrirtækið, byssan sem árásarmaðurinn notaði, byssa sem var í fórum óviðkomandi einstaklings og loks haglabyssa af gerðinni Maveric M-88 sem enn er ófundin.

Héraðssaksóknari tók við málinu af Lögreglunni á Norðurlandi eystra þann 10. febrúar. Undanfarnar rúmar tvær vikur hefur héraðssaksóknari haft málið til skoðunar en komst svo að niðurstöðu sinni í dag.