„Ég kann ekkert að vera einhleypur“

Í morgunþættinum Bakaríið á Bylgjunni síðasta laugardag ræddi Hilmir um leikhúsið, landsbyggðardrauminn og lífsins dans. 

Æfði dans og ballett í nokkra mánuði

„Ég blótaði þessu margoft þegar ég var á þessum dansæfingum. Ég vildi aðeins koma mér í form fyrir þetta, því ég er auðvitað að verða 54 ára, kominn með annan fótinn í gröfina,“ segir hann kíminn. 

Ég var að æfa þetta frá því í október, var með einka dansþjálfara og hún var með mig í tímum og lét mig dansa. Það var ballett og það var þetta og hitt. Ég var bara í þessu í marga mánuði.

Leikritið Mátulegir er byggt á dönsku kvikmyndinni Druk og fer Hilmir með eitt aðalhlutverka ásamt þeim Jörundi Ragnarssyni, Halldóri Gylfasyni og Þorsteini Bachmann. 

Alltaf í prómil

Hilmir segist njóta þess að vinna með þessum góða hópi leikara enda séu þeir allir miklir vinir líkt og karakterarnir sjálfir. 

Leikritið fjallar um að þarna eru menn sem komast að þeirri niðurstöðu að taka sameiginlega ákvörðun um það að verða „mátulegir“, eða alltaf í 0,5 prómil.

„Það á að uppfæra mann og á, samkvæmt heimspekingnum Søren Kierkegaard, að snúast um það að okkur vanti þessi 0,5 prómil af áfengi í mannskepnuna, bara í blóðið. Til þess að vera betra fólk, líða betur og gera allt betur. Vera glaðari, ákveðnari og beinskeyttari,“ segir Hilmir en eins og þeir sem hafa séð myndina Druk vita þá fer þessi tilraun jú ekki alveg eins og vonir báru til. 

Í spilaranum hér fyrir neðan er hægt að hlusta á viðtalið við Hilmi Snæ í heild sinni. 

Lattelepjandi landsbyggðar bóhem

Þrátt fyrir að hafa alist upp í miðbænum og vera að eigin sögn mikil miðbæjarrotta hefur landsbyggðin og lífið úti á landi alltaf heillað Hilmi. Hann er mikill hestamaður og veit fátt betra en ferðalög og ævintýri í íslenskri náttúru. Aðspurður hvernig hann sjái fyrir sér framtíðina hvað varðar búetu svarar hann: 

„Þú ert eiginlega að spyrja mig, hvernig sérðu fyrir þér endalokin,“ segir hann og skellir upp úr. 

Jú, ég sé svolítið fyrir mér að á næstu tíu til fimmtán árum muni ég koma mér svolítið fyrir úti á landi líka. Mig langar svolítið að eiga eitthvað notalegt athvarf þar og eiginlega búa þar mestmegnis. En eiga svo einhverja holu hérna í bænum, þegar ég þarf að vinna í bænum.

Hann segir ræturnar það sterkar í miðbæinn að hann gæti líklega ekki hugsað sér að búa alfarið úti á landi. 

Stígur varlega fyrstu skrefin í nýju lífi

Þegar talið best að hestamennskunni segist Hilmir ekki geta hugsað sér lífið án hennar en sjálfur er hann með hesthús í Kópavogi og sinnir hestamennskunni daglega þegar hrossin eru í húsi. 

Á hestbaki gleymir maður öllu öðru. Maður gleymir reikningunum, maður gleymir heimilisvandræðunum.

Mikil vatnaskil urðu í lífi Hilmis á síðasta ári en þá bárust fréttir af því að hann væri orðinn einhleypur eftir tólf ára hjónaband. 

Aðspurður út í upplifunina að koma aftur út á markaðinn eftir að hafa verið síðast einhleypur á síðustu öld, eins og hann orðar það, viðurkennir hann að allt sé mjög breytt. Yfir höfuð séu tæknimál eitthvað sem hann hafi alltaf þurft mikla aðstoð við svo að samskipti á samfélagsmiðlum og breytt landslag á stefnumótamarkaðinum séu vægast sagt framandi. 

Jú, jesús minn. Ég kann ekkert á þetta umhverfi. Þetta er mjög breytt umhverfi. Ég kann ekkert að vera einhleypur. Nú er bara að læra og taka fyrstu skrefin, í hálkunni.... 

bætir hann við glottandi og viðurkennir að stundum geti maður jú runnið á rassinn í hálkunni. 

Morgunþátturinn Bakaríið er á dagskrá alla laugardaga frá 9 - 12 á Bylgjunni. Hægt er að nálgast síðasta þátt í heild sinni í spilaranum hér fyrir neðan.