Seinni­partinn má sjá fyrstu merki breytinga í veður­kerfinu

Á vef Veðurstofunnar segir að víða verði talsvert frost, almennt þrjú til fimmtán stig. Seinnipartinn í dag megi svo sjá fyrstu merki breytinga í veðurkerfinu með vaxandi suðaustanátt. Mun þá þykkna upp með minnkandi frosti sunnan- og suðvestantil.

„Það gengur svo í suðaustan hvassviðri eða storm með snjókomu eða slyddu í nótt og rigningu í fyrramálið, um tíma talsverðri eða mikilli úrkomu sunnan- og vestanlands. Úrkomuminna norðaustantil. Hlýnandi veður, hiti 5 til 10 stig síðdegis.

Búast má við talsverðu afrennsli vegna úrkomu og snjóbráðnunar og vexti í ám og lækjum. Ísilagðar ár geta rutt sig og fólk er hvatt til að sýna aðgát vegna þess. Hyggilegt er að huga að niðurföllum til að vatn komist leiðar sinnar í fráveitukerfi og til að forðast vatnstjón. Flughálka mun líklega myndast á blautum klaka,“ segir í hugleiðingum veðurfræðings.

Veðurstofan hefur gefið úr gular viðvaranir á öllu landinu vegna þeirrar asahláku og sem mun myndast og hvassvirði. Viðvaranirnar taka gildi fyrri partinn á morgun og eru í gildi í sumum landshlutum fram á laugardag.

Veðurhorfur á landinu næstu daga

Á föstudag: Suðaustan 15-23 m/s um morguninn með slyddu eða rigningu og hlýnandi veðri, en þurrt á Norðurlandi. Sunnan 10-18 eftir hádegi, talsverð rigning sunnan- og vestanlands og hiti 5 til 10 stig.

Á laugardag: Sunnan 5-13 framan af degi og rigning, en þurrt að kalla um landið norðaustanvert. Snýst í vaxandi suðvestanátt síðdegis með éljum og kólnar.

Á sunnudag: Allhvöss eða hvöss suðvestanátt og víða snjókoma eða él. Frost 0 til 4 stig. Frostlaust og slydda eða rigning um tíma á Suðausturlandi.

Á mánudag: Stíf suðvestanátt og dálítil él, en bjartviðri um landið austanvert. Dregur úr vindi seinnipartinn. Frost 0 til 5 stig.

Á þriðjudag: Gengur í austlæga eða breytilega átt og víða snjókoma en rigning eða slydda við suðurströndina og úrkomuminna norðanlands. Styttir upp vestantil um kvöldið. Hiti um eða undir frostmarki en allt að 6 stigum syðst á landinu.

Á miðvikudag: Útlit fyrr minnkandi vestlæga átt. Víða léttskýjað en sums staðar dálítil él. Hiti í kringum frostmark.