H&M hættir með Bieber-línuna eftir skammir frá Bieber

Líkt og Vísir greindi frá í morgun var Bieber alls ekki sáttur með að vera orðinn andlit heillar fatalínu hjá H&M. Hann sagðist ekki hafa gefið leyfi fyrir notkun persónulíkinda sinna.

Fyrirtækið brást upphaflega við með því að segjast hafa fylgt öllum lögum og reglum hvað varðar notkun á persónulíkindum fólks. Nú greinir breska ríkisútvarpið hins vegar frá því að fyrirtækið hafi ákveðið að hætta að selja varninginn umdeilda.

„Af virðingu við samstarfið og Justin Bieber höfum við tekið allan varninginn úr sölu, bæði úr verslunum okkar og vefverslun,“ segir í tilkynningu frá fyrirtækinu.