Mætir mótspyrnu innan eigin flokks

McCarty varaði sjálfur við þessu á mánudaginn og sagði að ef Repúblikanar stæðu ekki saman, myndu Demókratar velja þingforseta.

Ástæðan er sú hófsamir Repúblikanar telja margir hverjir öfgakenndari þingmenn flokksins muni nýta sér það að McCarthy þarf nauðsynlega á þeim að halda til að þvinga hann til að framfylgja vilja þeirra, samkvæmt frétt Politico.

Þar er um að ræða þann væng flokksins sem tengist Donald Trump, fyrrverandi forseta, sem margir Repúblikanar kenna um hve illa þeim gekk í kosningunum. Meðal þingmannanna er hin umdeilda Marjorie Taylor Greene.

Jamie Harrison, nýkjörinn leiðtogi Demókrataflokksins í fulltrúadeildinni, deildi meðfylgjandi mynd á Twitter í gær. Hún sýnir McCarthy faðma Greene.

McCarthy hefur lengi viljað verða þingforseti og hefur aldrei farið leynt með það. Í aðdraganda þingkosninganna í byrjun nóvember gerðu kannanir og reynslan ráð fyrir því að Repúblikanar myndu ná tiltölulega góðum meirihluta í fulltrúadeildinni en svo fór ekki.

Sjá einnig: Slæmt gengi kemur niður á draumum McCarthy

Eins og staðan er núna tryggðu Demókratar sér 213 sæti í fulltrúadeildinni og Repúblikanar 220. Enn liggja úrslit ekki fyrir í tveimur kjördæmum. Washington post segir að líklega muni bæði þau sæti enda í höndum Repúblikana, þannig að þingið mun líklegast deilast milli flokka 222-213.

Til að ná meirihluta á þinginu þarf 218 þingsæti.

Þó nokkrir þingmenn standa í vegi McCarthy

Til að verða þingforseti þarf meirihluta frá þeim sem taka þátt í atkvæðagreiðslunni um embætti, sem fara mun fram þann 3. janúar.

McCarthy myndi að öllum líkindum ekki fá eitt einasta atkvæði frá þingmönnum Demórkataflokksins og því má hann ekki við því að missa atkvæði frá eigin þingmönnum. Í frétt Washington Post segir að minnst fimm þingmenn Repúblikanaflokksins hafi gefið í skyn að þeir styðji ekki McCarthy, en miðað við það gæti hann verið í vandræðum.

Þeir þingmenn sem styðja hann ekki gætu setið hjá og það myndi í raun lítil áhrif hafa þar sem McCarthy þarf einungis meirihluta greiddra atkvæða.

Samkvæmt yfirliti WP um hvað umræddir þingmenn hafa sagt um McCarthy eru minnst fjórir þeirra sem sagt hafa að þeir muni ekki veita honum atkvæði þeirra. Einn til viðbótar hefur sagt að hann vilji annan forseta en það komi til greina að kjósa McCarthy.

Þá eru fimm þingmenn til viðbótar sem hafa gefið opinberlega í skyn að þeir séu mótfallnir því að McCarthy verði þingforseti, án þess að segja það hreint út.

Einn þingmaður sagði þar að auki við blaðamann Politico að hann vissi af fleirum sem hefðu ekkert sagt opinberlega en hefðu áhyggjur af stöðunni.

Ætlar að rannsaka rannsóknarnefndina

McCarthy varaði í gær þingmennina í nefndinni sem rannsakað hefur árásina á þinghúsið þann 6. janúar í fyrra við og sagði þeim að varðveita gögn þeirra vegna rannsóknarinnar. Því undir stjórn hans myndi þingið rannsaka rannsókn þingnefndarinnar á næsta ári.

Repúblikanar hafa áður gefið í skyn að nefndin verði felld niður á næsta ári. Búist er við því að nefndin muni gefa út ítarlega skýrslu í þessum mánuði.

Í frétt New York Times segir að reglur þingsins segi þegar til um að meðlimir nefndarinnar eigi að varðveita öll gögn vegna rannsóknarinnar. Þá kemur þar fram að McCarthy hafi í bréfi sem hann sendi á formann nefndarinnar að heitið því að halda opna þingfundi um árásina, þegar stuðningsmenn Trumps brutu sér leið inn í þinghúsið með því markmiði að koma í veg fyrir formlega staðfestingu úrslita forsetakosinganna 2020.

Miðað við orð McCarthy ætlar hann þó að einblína á af hverju þinghúsið hafi ekki verið betur verið í stað þess að skoða hvað leiddi til árásarinnar, eins og þingnefndin hefur gert. 

Rannsaka einnig Pelosi og Dómsmálaráðuneytið

Repúblikanar og þá sérstaklega þeir sem eru hvað lengst til hægri, eins og Greene, hafa ítrekað haldið því fram að öryggisleysi megi kenna um árásina á þinghúsið og logið því að Nancy Pelosi, fyrrverandi leiðtogi Demókrataflokksins í fulltrúadeildinni og þingforseti, hafi borið ábyrgð á því.

Greene hefur einnig fengið McCarthy til að lofa sér því að þingið muni rannsaka Pelosi og það hvernig Dómsmálaráðuneyti Bandaríkjanna hefur komið fram við fólk sem dæmt hefur verið fyrir að taka þátt í árásinni.