Saga Harley-Davidson komin á prent

Bókin er 178 síður og fjallar um sögu Harley-Davidson-mótorhjólanna, aðallega hérlendis en einnig erlendis, en einnig er komið inná sögu annarra mótorhjóla af amerískum uppruna.

 Byrjað er á forsögunni og fyrstu hjólunum en einnig er farið yfir sögu hvers einasta hjóls frá því fyrir stríð og margra þeirra sem komu seinna. Sérstakur kafli er um sögu lögreglunnar, en þáttur hennar í sögu Harley-Davidson á Íslandi er stór.

Njáll hefur safnað efni um gömul mótorhjól á Íslandi í 30 ár og því hafði hann úr mörgu að moða þegar kom að því að skrifa þessa bók.

„Ég hef til dæmis safnað öllum skráningarupplýsingum sem ég gat fundið og þess vegna er hægt að rekja eigendasögu hjólanna mjög nákvæmlega sem er að vissu leyti einstakt,“ segir Njáll. Einnig er myndasafn Njáls mjög stórt þegar kemur að gömlum mótorhjólum á Íslandi. Í því safni eru vel á fimmta hundrað mynda af Harley-Davidson-hjólum og eru margar þeirra í bókinni og hefur stór hluti þeirra ekki birst á prenti áður.

„Það er mikil vinna að afla heimilda í bók sem þessa og eru viðmælendur margir en einnig hefur fólk verið duglegt að senda mér efni, bæði upplýsingar, sögur og myndir. Sem dæmi fékk ég send dagbókarbrot frá niðjum Jóns Sigurgeirssonar á Helluvaði. Þar lýsir hann á skemmtilegan hátt reynslu sinni af því að nota tvö gömul Harley-Davidson mótorhjól frá því í kringum 1920, og er þessi lýsing hans einstök heimild,“ segir Njáll ennfremur.

Í gömlum skráningarupplýsingum má sjá að annað þessara hjóla hans var frá 1920 og er þá hægt að sjá vélarnúmer þess, og tengja það við mynd sem til er af hjólinu á Minjasafninu á Akureyri, en hjólið bar númerið A-136. 

Njáll vill einnig taka fram að þótt að bókin sé komin á prent haldi söfnun heimilda áfram, en hann heldur meðal annars úti heimsíðunni fornhjol.is þar sem hann birtir efni um gömul mótorhjól. Njáll er þegar farinn að huga að efni í næstu bók, og líklega verða mótorhjól frá Evrópu þar efst á blaði og þá sérstaklega bresk mótorhjól, sem algeng voru á Íslandi.