Bein útsending: Kvöldfréttir Stöðvar 2

Maðurinn sem lést í rafhlaupahjólaslysi við Barónsstíg í gær var erlendur karlmaður á þrítugsaldri, búsettur á Íslandi. Við fjöllum um þennan harmleik í miðborginni og sýnum frá minningardegi fórnarlamba umferðarslysa, sem bar upp í dag. Kona sem varð valdur að banaslysi á barni fyrir 30 árum lýsir erfiðu lífi sem hefur litast af sektarkennd.

Þá hittum við fimmtuga konu sem reyndi að svipta sig lífi vegna heilsuleysis og stanslausra verkja. Hún segir nauðsynlegt að heilbrigðisstarfsmenn kynni sér einkenni breytingaskeiðs. Hún gekk á milli lækna í sjö ár og þurfti hálfpartinn að sannfæra sérfræðinga um að skrifa upp á hormónin sem breyttu lífi hennar. Við heyrum áhrifaríka sögu hennar í kvöldfréttum.

Við ræðum einnig við Svandísi Svavarsdóttur matvælaráðherra um sögulegan samning sem náðist á COP27 í Egyptalandi í gærkvöldi. Svandís er nýkomin heim af ráðstefnunni og lýsir blendnum tilfinningum í garð samþykktarinnar. 

Og svo er það auðvitað hið umdeilda heimsmeistaramót karla í knattspyrnu, sem hófst í Katar í dag. Við förum ítarlega ofan í aðdraganda mótsins, meint mannréttindabrot og spillingu sem litað hafa alla umræðu um þennan stórviðburð í knattspyrnuheiminum. Þetta og margt fleira í kvöldfréttum Stöðvar 2 á slaginu 18:30.