Hvessir seinni­partinn og þykknar upp

Í hugleiðingum veðurfræðings segir að það hvessi seinnipartinn og þykkni upp – verði allhvasst eða hvasst syðst í kvöld. Hiti á landinu verður á bilinu núll til átta stig, mildast syðst.

„Austanstrekkingur á morgun, en hvassviðri syðst. Skýjað að mestu, en dálítil slydda eða snjókoma austantil á landinu og kólnar heldur. Dregur smám saman úr vindi á sunnudag, en áfram smá rigning eða slydda fyrir austan.“

Veðurhorfur á landinu næstu daga

Á laugardag: Austan 8-15 m/s, en 15-20 syðst. Dálítil rigning eða slydda á austanverðu landinu, og með suðurströndinni, en annars skýjað með köflum og þurrt. Hiti 0 til 6 stig.

Á sunnudag: Austan- og norðaustan 8-15 m/s, hvassast með suðurströndinni. Bjartviðri vestantil, en annars skýjað og lítilsháttar rigning eða slydda við sjávarsíðuna. Hiti 0 til 6 stig.

Á mánudag: Stíf austlæg átt og rigning eða slydda með köflum, en bjartviðri vestantil. Hiti 0 til 5 stig.

Á þriðjudag, miðvikudag og fimmtudag: Útlit fyrir austlægar- og norðaustlægar áttir með rigningu öðru hvoru og hægt hlýnandi veður.