Henry líkir Mbappé við dekraðan krakka: „Eins og hann hafi aldrei heyrt orðið nei á ævinni“

Samningur Mbappé við Paris Saint-Germain átti að renna út í sumar og hann var mikið orðaður við Real Madríd á Spáni. Hann ákvað hins vegar að vera áfram í frönsku höfuðborginni og mikið var rætt um geigvænleg loforð PSG til framherjans samhliða samningnum.

„Þeir lofuðu honum að kaupa nýjan framherja svo hann fengi að sína spila sína bestu stöðu til hliðar við framherjann, að Neymar yrði seldur, að þeir myndu kaupa miðvörð og Mbappé yrði miðpunktur alls. Ekkert af þessu hefur gerst,“ sagði franski blaðamaðurinn Julien Laurens.

Vegna þess að Mbappé fær ekki að spila sína uppáhaldsstöðu er hann því sagður vilja fara frá félaginu en mál hans var til umræðu í Meistaradeildarþætti CBS í gærkvöld þar sem Thierry Henry, goðsögn í frönskum fótbolta, og Jamie Carragher, fyrrum varnarmaður Liverpool, ræddu Mbappé.

Ef stjórinn biður þig um að gera eitthvað þá gerir þú það

„Við vitum að honum líkar ekki við stöðuna. Enginn hefur gaman að því að vera berskjaldaður og spila stöðu sem undirstrikar veikleika manns. En félagið á alltaf að vera stærra en leikmaðurinn. Spurningin er hvort félagið hafi látið honum líða eins og hann sé stærri en liðið,“ segir Henry sem tók þá dæmi af sjálfum sér hjá Barcelona en Henry hafði afrekað töluvert meira en Mbappé þegar hann skipti til spænska stórliðsins árið 2007, þá þrítugur.

„Takandi dæmi af sjálfum mér. Mér fannst ekki gaman að spila á kantinum hjá Barcelona. Ég þoldi það ekki. En ég þurfti að gera það fyrir liðið. Ég, með mína 100 plús landsleiki og 51 landsliðsmark, þurfti að fara á vinstri kantinn. Ég heyrði engan segja, vá þvílík fórnfýsi að hann spili á kantinum á meðan aðrir með færri landsleiki og mörk spila frammi,“

„En það var alltaf ein regla: Ef stjórinn biður þig um að gera eitthvað þá gerir þú það fyrir hag liðsins. Það er ef liðið er að vinna, ef liðið væri að tapa myndi ég skilja gremjuna,“

Of mikið egó og of mikil völd

Carragher talar þá um loforðin sem Mbappé voru gerð þar sem virtist sem svo að honum væri gefin völd sem enginn leikmaður á að hafa.

„Tilfinningin mín í sumar var ekki aðeins að Mbappé væri gerður að stjörnu liðsins heldur var nánast eins og hann væri orðinn yfirmaður knattspyrnumála. Að hann hefði ákvörðunarrétt þegar kæmi að ráðningu þjálfarans og hvaða leikmenn ætti að kaupa,“ sagði Carragher.

„Fyrir mér er eins og hann hafi aldrei heyrt orðið nei á ævinni,“ sagði Henry þá.

„Við elskum öll Mbappé sem leikmann. Hann er ótrúlegur. En það er of mikið egó og völd fyrir 24 ára gamlan leikmann. Eins og Thierry segir, það þarf einhver einfaldlega að segja við hann nei,“ sagði Carragher.

Umræðuna má sjá í spilaranum að ofan.