Telja Trump enn vera með opinber gögn

Samkvæmt frétt New York Times tilkynnti einn af yfirmönnum ráðuneytisins lögmönnum Trumps nýverið að starfsmenn ráðuneytisins væru þeirrar skoðunar að Trump hefði ekki verið samstarfsfús en óljóst er hvaða afleiðingar það gæti haft í för fyrir Trump.

Þá er sömuleiðis ekki ljóst hvort sönnunargögn um að Trump hafi falið opinber gögn og neitað að afhenda þau eftir að húsleit var gerð heima hjá honum.

Eins og frægt er lögðu starfsmenn Alríkislögreglu Bandaríkjanna (FBI) hald á mikið magn opinberra og leynilegra gagna í Mar a Lago, sveitaklúbbi og heimili Trumps í Flórída, þegar húsleit var gerð þar í ágúst. Trump vill meina að hann eigi muni og gögn sem hald var lagt á og einnig að trúnaður ríki um önnur gögn.

Lögum samkvæmt hefði Trump átt að afhenda Þjóðskjalasafni Bandaríkjanna öll opinber gögn í hans vörslu er hann flutti úr Hvíta húsinu í janúar í fyrra.

Af um ellefu þúsund skjölum sem hald var lagt á í Mar a Lago voru um hundrað merkt sem leyniskjöl og er til rannsóknar hvort Trump hafi brotið lög varðandi leyndarmál ríkisins.

Sjá einnig: Neita að reyna að sanna hvort Trump hafi svipt leynd af gögnunum

Miklar lagaflækjur hafa myndast á málinu en alríkisdómari sem Trump skipaði í embætti skipaði nýverið gerðardómara til að fara yfir gögnin og leggja mat á hvaða skjöl Trump gæti mögulega átt og hvaða gögn trúnaður ríkti um. Dómarinn meinaði einnig dómsmálaráðuneytinu að nota gögnin í sakamálarannsókn á meðan þessi skoðun stendur yfir.

Ráðuneytið áfrýjaði þeim úrskurði og þá komst áfrýjunardómstóll að þeirri niðurstöður að ráðuneytið mætti nota gögnin og að gerðardómarinn þyrfti ekki að skoða gögn sem væru merkt sem ríkisleyndarmál.

Trump leitaði nýverið á náðir Hæstaréttar Bandaríkjanna vegna málsins en hann hefur haldið því fram að hann hafi svipt leynd af gögnunum, sem engar sannanir eru fyrir.

NYT segir deilur hafa komið upp milli lögmanna Trumps um afstöðu þeirra til rannsóknarinnar. Einn þeirra vildi ráða sérstakt ráðgjafafyrirtæki til að leita að frekari opinberum gögnum og er Trump sagður hafa samþykkt það. Aðrir lögmenn í hópnum hafi þó sannfært forsetann fyrrverandi um að taka harðari afstöðu gegn rannsókn ráðuneytisins og að hætta við að ráða áðurnefnt fyrirtæki.

Afstaða Trumps og lítill áhugi hans á að starfa með rannsakendum er sagt hafa sett starfsmenn ráðuneytisins í erfiða stöðu. Þeir hafi nokkra erfiða kosti.

Einn þeirra sé að hætta að leita að og reyna að koma höndum yfir opinber gögn sem kunna að vera enn í fórum Trumps. Fleiri eru að stefna Trump og krefjast gagnanna, gera fleiri húsleitir og reyna að þvinga Trump til vitnisburðar.