Kross 1. umferðar: Vígðu nýja heimavöllinn með stæl og Róbert Aron spólaði til baka

Ingvi Þór Sæmundsson skrifar 13. september 2022 11:00

Róbert Aron Hostert er markahæstur í Olís-deild karla. vísir/diego

Keppni í Olís-deild karla í handbolta hófst í síðustu viku. Fimm leikir fóru þá fram í 1. umferð deildarinnar. Hverjir áttu góðan dag og hverjir slæman? Hverjir þurfa að hafa áhyggjur og hvað sagði tölfræðin? Vísir fer yfir umferðina á léttum og gagnrýnum nótum.

Þrefaldir meistarar Vals sluppu með skrekkinn gegn Aftureldingu, Grótta rúllaði yfir nýliða ÍR í fyrsta leiknum undir stjórn Róberts Gunnarssonar, Fram vígði nýja heimavöllinn með sannfærandi sigri á Selfossi, þjálfaralausir KA-menn í blakbúningum töpuðu fyrir Haukum og Stjörnumenn sýndu að þeim er alvara með því að vinna í Kaplakrika þangað sem fá lið sækja stig. Það var eini útisigurinn í 1. umferð sem lýkur með leik ÍBV og Harðar 2. október. Honum var seinkað vegna þátttöku Eyjamanna í Áskorendabikar Evrópu.

Umfjöllun og viðtöl úr 1. umferð Olís-deildar karla

Fram 33-26 Selfoss

Valur 25-24 Afturelding

Grótta 31-20 ÍR

FH 28-33 Stjarnan

Haukar 27-21 KA

Góð umferð fyrir ...

Tandri Már Konráðsson var ekki á meðal markaskorara gegn FH en gaf slatta af stoðsendingum eins og samherjar hans.vísir/hulda margrét

League Pass Frammara

Miðað við fyrsta leik sinn er Fram tilvalið League Pass-lið ef svo má segja. Ekkert endilega það besta í deildinni en áhorfsvænt og með skemmtilega leikmenn sem þeir hlutlausu geta hrifist af. Frammarar spiluðu gríðarlega hraðan bolta gegn Selfyssingum og samkvæmt þjálfara þeirra, Einari Jónssyni, er þetta það sem koma skal og það er vel. Einar er með nóg af leikmönnum en til marks um það voru spilarar á borð við Breka Dagsson, Arnar Snæ Magnússon og Alexander Má Egan utan hóps gegn Selfossi. Fram á eftir að fá erfiðari próf en byrjunin lofar góðu.

Róbert Aron Hostert

Hann getur víst enn skotið! Róbert Aron spólaði aftur í tímann og setti upp skotsýningu gegn Aftureldingu. Hann skoraði tólf mörk í fimmtán skotum og náði tveggja stafa tölu í markaskorun í fyrsta sinn í búningi Vals. Og meistararnir þurfu svo sannarlega á hans framlagi að halda gegn Aftureldingu enda náðu aðrir útispilarar liðsins sér ekki á strik. Róbert Aron hefur verið meiðslum hrjáður undanfarin ár en ef hann er heill kemur hann með nýja breidd í lið Vals.

Samvinnu Stjörnumanna

Stjarnan skoraði 33 mörk gegn FH og á bak við þau voru hvorki fleiri né færri en 25 stoðsendingar. Stjörnumenn tóku aðeins þrettán skot fyrir utan en voru duglegir að opna vörn FH-inga fyrir horna- og línumenn sína sem höfðu úr nægu að moða í Krikanum. Patrekur Jóhannesson gladdist eflaust mjög að sjá samvinnu sinna manna í sókninni og hvernig þeir opnuðu fyrir hvern annan.

Slæm umferð fyrir ...

Dagur Gautason snerti varla boltann í fyrsta leik sínum fyrir KA eftir endurkomuna.ka

Dag Gautason

Greyið Dagur gerði svo sem ekkert vitlaust í leik Hauka og KA. Hann fékk boltann bara aldrei. Dagur fékk ekki eitt einasta færi í leiknum, hvorki í uppstilltri sókn né hraðaupphlaupum. Eflaust vöknuðu upp óþægilegar minningar frá því hann spilaði með hinum hornablinda Tarik Kasumovic fyrir nokkrum árum. Vonandi fyrir Dag og KA finna samherjar hans hann oftar í næstu leikjum því það er synd að þessi frábæri hornamaður sé aðgerðalaus í sókninni í heilan leik.

Óskarssyni

Þeir Benedikt Gunnar og Arnór Snær Óskarssynir léku á als oddi í Meistaraleiknum gegn KA en voru illa tengdir gegn Aftureldingu. Benedikt var með eitt mark í fimm skotum og Arnór þrjú mörk í sjö skotum. Þeir tóku samtals fjögur víti en aðeins eitt þeirra fór í markið. Þótt Óskarssynir hafi ekki fundið sig kom það ekki að sök. Valsmenn eru með frábæran mannskap og að þessu sinni var Róbert Aron hetjan.

FH-ingum var spáð nokkuð góðu gengi fyrir tímabilið en miðað við leikinn gegn Stjörnumönnum var kannski ekki alveg nógu mikil innistæða fyrir því. Sigursteinn Arndal þurfti að játa sig sigraðan gegn æfingafélaga sínum, Patreki Jóhannessyni, og á greinilega enn eftir að herða skrúfurnar betur fyrir framhaldið. Vörn FH var ólík sjálfri sér og greinilegt er að Ágústs Birgissonar er sárt saknað.

Fokk, við þurfum að hafa áhyggjur

Miðað við leikinn gegn Frömmurum eru Selfyssingar komnir ansi stutt á veg. Sunnlendingar virtust hreinlega spila á öðrum hraða en bláliðar. Það kristallaðist kannski í leik Ísaks Gústafssonar sem byrjaði af miklum krafti en gaf svo hressilega eftir. Selfoss styrkti sig ekkert fyrir tímabilið en sé mið tekið af leiknum gegn Fram hefði svo sannarlega verið þörf á því.

Besti ungi leikmaðurinn

Haukar voru í miklum vandræðum framan af gegn KA en það breyttist eftir að Andri Már Rúnarsson kom inn á í sínum fyrsta leik fyrir félagið. Þrátt fyrir að hafa bara náð nokkrum æfingum með Haukum sneri Andri leik liðsins, skoraði fimm mörk og gaf sex stoðsendingar. Koma hans í Hauka gjörbreytir landslaginu í deildinni.

Tölfræði sem stakk í augun

Jovan Kukobat lék sinn fyrsta leik fyrir Aftureldingu gegn Val og frammistaðan var ekki af verri endanum. Hann varði ellefu af þeim tuttugu skotum sem hann fékk á sig (55 prósent), þar af öll fjögur vítin sem hann fékk á sig.