Enn bætist á vandræði Trumps

Sjóðurinn var stofnaðu í kjölfar þess að Trump tapaði kosningunum gegn Joe Biden árið 2020 og hafa fúlgur fjár safnast í hann á grunni lyga Trumps um að umfangsmikið kosningasvindl hafi kostað hann sigur.

Sjá einnig: Trump safnar enn fúlgum fjár á grunni lyga

Stefnur hafa verið gefnar út vegna rannsóknarinnar en í frétt New York Times segir að þær gefi til kynna að saksóknarar vilji læra meira um innri starfsemi sjóðsins. Stefnur hafa borist þeim sem að sjóðnum koma en fólk sem vann fyrir Trump í Hvíta húsinu og í tengslum við forsetaframboð hans hefur einnig verið stefnt.

Þetta er til viðbótar við nokkrar aðrar rannsóknir sem snúa að viðleitni Trumps og bandamanna hans við að reyna að snúa niðurstöðum kosninganna. Sú viðleitni og lygar Trump-liða leiddu meðal annars til árásarinnar á þinghúsið 6. janúar í fyrra.

Dómsmálaráðuneytið er þar að auki með Trump til rannsóknar vegna opinberra og leynilegra gagna sem hann tók með sér þegar hann flutti úr Hvíta húsinu og til Flórída.

Sjá einnig: Fundu leynigögn um kjarnorkuvopn á heimili Trumps

Lögmenn ráðuneytisins sendu í gær kröfugerð til dómara sem úrskurðaði nýverið í málinu að utanaðkomandi aðili skyldi fenginn til að fara yfir gögnin og í millitíðinni mætti ráðuneytið ekki nota þau til frekari rannsókna.

Ákvörðunin var harðlega gagnrýnd og hafa ýmis spjót beinst að dómaranum, Aileen Cannon, sem var skipuð í embætti á síðustu dögum forsetatíðar Trumps.

Trump og bandamenn hans í Repúblikanaflokknum kepptust við að skipa eins marga dómara í ævistörf eins og þeir gátu á kjörtímabili Trumps. Repúblikanar í öldungadeild Bandaríkjaþings höfðu áður komið í veg fyrir að Barack Obama, fyrrverandi forseti, gæti skipað dómara.

Margir þessara dómara voru ungir og reynslulitlir íhaldsmenn. 

Sjá einnig: „Þetta mun hafa afleiðingar 40 ár fram í tímann“

Saksóknarar vilja að Cannon skipti um skoðun og leyfi rannsakendum að halda áfram að skoða gögnin. Nauðsynlegt sé að tryggja að búið sé að finna öll leynileg gögn.

Samkvæmt frétt Reuters vilja saksóknar að kröfugerð þeirra verði svarað fyrir 15. september, annars muni þeir áfrýja úrskurði hennar. Slík áfrýjun færi fyrir nefnd ellefu alríkisdómara en Trump skipaði sex af þeim í embætti.

Í áðurnefndri kröfugerð sem send var í gær kemur fram að starfsmenn Alríkislögreglu Bandaríkjanna (FBI) og Þjóðskjalasafns Bandaríkjanna hafi mögulega ekki fundið öll opinber og leynileg gögn í vörslu Trumps. Saksóknararnir sem sendu bréfið segja nauðsynlegt að rannsaka málið sem fyrst og tryggja að gögnin sem kunni að vera enn ófundin ógni ekki þjóðaröryggi Bandaríkjanna.

Deilurnar um skjölin urðu fyrst opinberar í febrúar eftir að starfsmenn sóttu skjöl til Mar-a-Lago, sveitarklúbbar Trumps í Flórída. Eftir það kom í ljós að Trump hafði ekki skilað öllum þeim opinberu gögnum sem hann hefði samkvæmt lögum átt að skila til Þjóðskjalasafnsins.

Fleiri gögn voru sótt í júní og þá staðhæfðu lögmenn Trumps að engin frekari opinber og/eða leynileg gögn væri að finna í Flórída. Það var ósatt og lék grunur á að gögn hefðu verið falin. Sá grunur virðist hafa reynst réttur en FBI framkvæmdi húsleit í Flórída í ágúst og fannst þá mikið magn opinberra og leynilegra gagna.